Footer

BANNER NEWS: CAFC ti Vigan City, 2 mannalon iti rehion, national awardees

SAN FERNANDO CITY – Tallo kadagiti nangabak a regional outstanding farmers ken farmer’s organization ti nangiyalat iti national award iti kategoria a nakisalipanda.

Napili a national awardee da Claudio Agcaoili ti Alejo Malasig, Vintar, Ilocos Norte, kas outstanding rice farmer;  ni Alfredo Nisperos ti Cabaroan, San Juan, La Union, outstanding high value commercial crops farmer ken ti City Agriculture and Fishery Council ti Vigan City kas outstanding CAFC of the Philippines.

Sakbayna, itay Septiembre 17, pinadayawan ti Department of Agriculture GAWAD SAKA dagiti outstanding farmers, organizations ken agricultural technologists iti rehion iti seremonia a naangay iti kapitolio ti La Union itoy a siudad itay Setiembre 17, 2008.

Malaksid kada Agcaoili, Nisperos ken ti CAFC ti Vigan City, nabigbig kas  outstanding HVCC farmer ni Ricardo Tolentino ti Barangay 6, Laoag City; outstanding large animal raiser ni Moises Saladino ti Zamboanga, Laoag City; outstanding young farmer ni Herbert Valdez ti Pantar Sur, Balaoan, La Union; outstanding farmer/fisherfolk family ti pamilia ni Rogelio Ramos ti Urayong, Bauang, La Union; outstanding farmer and fisherfolk organization ti Anduyan Multi- Purpose Cooperative manipud iti Tubao, La Union;

Napili ni Generosa Blas  manipud iti Vintar, Ilocos Norte kas outstanding municipal agriculture officer ken ni Cecilia Sambrano ti San Nicolas, Ilocos Norte, kas outstanding agricultural technologist .

Naikkan met iti special citation award ni Jeffrey Esteban ti Barit, Laoag City kas outstanding small animal raiser ken ti Bulbulala R.I.C. ti Vintar, Ilocos Norte kas  outstanding rural improvement club.

Kinuna ni Gob. Deogracias Victor Savellano nga agserbi nga inspirasion dagiti napadayawan para kadagiti dadduma pay a mannalon tapno tuladenda dagitoy nga umarakup iti agduduma a programa ti gobierno iti benneg ti agrikultura.

“Agserbikayo kas sarming a mangipakita iti agtultuloy a panagtrabaho ti turay para iti pagsayaatan ti umili,” kinuna ti RDC chairman.

Kinuna DA Regional Director Cipriano Santiago, nga agserbi koma dagiti napadayawan a manggutigot kadagiti estudiante nga adda kuarta iti agrikultura.

Kinunana a madlaw a bumasbassiten ti mayat nga agenrol iti kurso mainaig iti agrikultura ket in-inut a bumassit ti bilang dagiti technologists a mangisuro iti kabaruan a teknolohia kadagiti mannalon a mabalin a mangitunda iti pannakatay daytoy a sektor.

“Saanda a maamiris a  maysa a lucrative business ti agrikultura,” innayon pay ni Santiago.

Awatento dagiti tallo ti gunggonada iti maysa a seremonia a maangay iti Manila inton umay a bulan.#