BANNER NEWS: All-out campaign para Vigan iti final leg ti New7Wonders Cities: Mayor Medina

VIGAN CITY – Maysa laengen nga addang ket dakkel ti namnama a mairaman daytoy napnuan pakasaritaan a siudad a maysa kadagiti pito a pagsidsiddaawan a siudad iti sangalubongan, daytoy ti nakuna dagiti agtuturay ditoy siudad kalpasan a limsot itay Oktubre 7 ti Vigan City a maysa kadagiti 14 finalists para iti New7Wonders Cities of the World.

Iti pannakiumanna iti media kalpasan ti panangiwaragawag ni Bernard Weber, founder ken presidente iti New7Wonders dagiti 14 finalists para iti New7Wonders Cities of the World, kinuna ni Mayor Eva Marie S. Medina a saanen a pinaturog dagiti nagsasaruno a naawatna a kablaaw ken panagtultuloy a suporta manipud kadagiti gagayyemda, grupo, ken nadumaduma a sektor ken ahensia ti gobierno ken pribado a sektor a mangsupsuporta iti kampania ti Vigan City para iti New7Wonders Cities of the World.

Malaksid ti Vigan, karaman a finalists ti Barcelona (Spain), Beirut (Lebanon), Chicago (United States), Doha (Qatar), Durban (South Africa), Havana (Cuba), Kuala Lumpur (Malaysia), La Paz (Bolivia), London (United Kingdom), Mexico City (Mexico), Perth (Australia), Quito (Ecuador) ken Reykjavik (Iceland).

Ti laengen Vigan ken Kuala Lumpur dagiti nabatbati a siudad iti Asia a karaman a finalist iti New7WondersCities.

Iti maysa nga statement, kinuna ni Eamonn Fitzgerald, hepe ti communication iti New7Wonders a babaen daytoy bassiten a listaan, matulongan dagiti agbutos a mangipamaysa ti imatangda iti pannakaawatda iti kangrunaan a turong a mangsuksukog iti lubong iti agdama – ti urbanisasion.

Ngem kinuna ni Medina a back to zero ti panagbubutos para iti final leg ti New7Wonders Cities ket masapul ti all-out a kampania tapno mairaman ti Vigan iti pinal a pito a siudad a pagsiddaawan iti sangalubongan.

Karaip ti panagyamanna kadagiti timmultulong iti kampania ti Vigan City, impalagip ni Medina ti panagtultuloy ti suportada iti Vigan iti daytoy final leg ti kampaniana iti New7Wonders Cities.

Iti pattapatta ti mayora ket saan a bumaba iti lima a milion a butos ti nangitag-ay kadagiti 14 a finalists para iti New7Wonders Cities of the World.

Kinuna ni Medina a dakkel ti nagapuanan dagiti promosion nga insayangkat ti siudad iti daytoy a kampania ket agtugawda manen nga agpanunot kadagiti ad-adu pay a wagas tapno maitag-ay ti Vigan iti daytoy maudi a rikus ti kampaniana iti New7Wonders Cities of the World.

Kinuna ni Medina a planoda ti mangiwayat iti raffle iti text messaging a maikkan iti premio dagiti mangi-text iti Vigan iti New7Wonders Cities, kas iti inaramid ti Palawan kas paset ti kampaniana a mairaman kadagiti nabutosan iti New7Wonders of Nature.
Maysa a lawas sakbayna, inrusat ti mayora ti Text Vote Brigade ket naggigiddan dagiti opisial ti siudad a pakaibilangan dagiti city councilors a nangitext iti butosda iti Vigan City.

Kasta met a kas suporta ti gobierno probinsial iti Vigan City, nangipaulog ni Gov. Ryan Singson iti memorandum a pannakaituding ti Oktubre 7 manipud ti 8:00-9:00 a.m. a pannakaiwayat ti simultaneous text voting para iti Vigan City iti New7Wonders of the World.

Iti daytoy a petsa, mismo nga indauluan ni Vice Gov. Deogracias Victor Savellano dagiti bokal, hepe dagiti nadumaduma nga ahensia ti gobierno ken empleado ti gobierno probinsial ti panaggigiddanda a nangibutos iti Vigan babaen iti text.

Kinuna ni Medina a back to zero
manen ti panagbubutos ket on equal footing amin dagiti 14 finalists isu nga all-out campaign ti isayangkat ti gobierno ti siudad iti daytoy final phase iti kampania ti Vigan iti New7Wonders Cities of the World.#