BANNER NEWS: Cardinal Quevedo, napili nga outstanding Laoageño

LAOAG CITY – Maysa ni kabarbaro a Cardinal Orlando B. Quevedo kadagiti napadayawan nga outstanding Laoageños iti panangselebrar daytoy siudad iti  panagpiestana a nangrugi itay Pebrero 1.

Tinawen a mait-ited daytoy prestihioso a pammadayaw kadagiti annak ti Laoag a nagballigi iti tay-ak a sinerkanda.

Sakbayna, idi Enero 12, inwaragawag ni Pope Francis a maysa ni Quevedo, arsobispo iti Cotabato City, ken dati a dadaulo ti Catholic Bishops Conference of the Philippines, kadagiti 16 a maital-o a kabarbaro a cardinal ti Roman Catholic Church.

Maaramid ti induction da Quevedo iti College of Cardinals inton Pebrero 22. Isu ti kaunaan a cardinal manipud iti Mindanao.

Naiyanak ni Quevedo iti Laoag, Ilocos Norte idi Marso 11, 1939.

Nagbasa iti Grades 1-3 iti Shamrock Elementary School iti Laoag City manipud 1945 agingga iti 1947.

Napan ti pamiliana iti Mindanao ket nagbasa iti Grades 4-6 iti Marbel Central Elementary School, South Cotabato a nagturposanna idi 1950.

Nagbasa iti Notre Dame High School manipud 1950-1954.

Simrek iti San Jose Seminary idi 1954 agingga idi 1956, pinalabasna ti novitiate iti  St. Peter’s Novitiate in Mission, Texas, sana kinumpleto ti Philosophy degree iti San Jose Seminary idi 1960.

Idi 1964, nakumpletona ti S.T.B. ken MA in Religious Education from Oblate College (Catholic University of America) sadiay Washington, DC.

Idi Hunio 5, 1964, naordenan a padi ti Missionary Oblates of Mary Immaculate.

Kalpasan a naordenan a padi, nagserbi iti Kidapawan, Cotabato, nagbalin a Bishop of the Prelate of Kidapawan, Bishop of the Diocese of Kidapawan, Archbishop iti Nueva Segovia a mangsaklaw iti Ilocos Sur ken Ilocos Norte ken ti Cordillera Region, sa Archbishop iti Cotabato a pagserserbianna sakbay a napili ni Pope Francis a maysa kadagiti 16 a baro a Cardinal.

Immun-una ngem daytoy, maysa a resolusion ti inaprobaran ti sangguniang panlalawigan ti Ilocos Sur a mangted iti pelisitasion ken ni Quevedo iti pannakapilina a maysa kadagiti 16 a kabarbaro a Cardinal ti Roman Catholic Church.

Kas sagudayen ti resolusion nga imbasa ni Bokal Edgar Yabes, “maysa a tangsit ken inspirasion ti maysa a padi a nagserbi iti probinsia ti Ilocos Sur iti takemna a kas Arsobispo ti Nueva Segovia, ti panagba-linna a kabarbaro a Cardinal iti Roman Catholic Church iti Pilipinas”.

Idi panawen a panagtakemna kas Arsobispo ti Nueva Segovia nga inrusat ni Quevedo dagiti reporma ken panangi-duron iti tignay ti kooperatiba tapno tumulong iti pannakaipa-baba ti kinapanglaw dagiti kailianna babaen ti panang-buangayna iti Nueva Segovia Consortium of Cooperatives a “nagbalin a sibibiag a tawid iti dedikasionna.

Ni Quevedo ti maikapat a Cardinal ti pagilian, kaunaan iti Mindanao.  Da Luis Antonio Tagle, Archbishop of Manila; Gaudencio Rosales, Arch-bishop-Emeritus of Manila ken Ricardo Vidal, Archbishop-Emeritus of Cebu dagiti immu-na a nadutokan a Cardinal.#