BANNER NEWS: Chavit, pabor iti pannakaingato ti buis ti sigarilio

Pabor ni Gov. Luis “Chavit” Singson iti gakat a mangingato iti buis ti sigarilio wenno sin tax.

Iti naangay a press conference iti Baluarte idi Marso 6, kinuna ni Singson a dagiti cigarette manufacturers ti bumakbaknang idinto a kakaasi dagiti mannalon iti tabako a tinawen a kasla agpalpalama tapno laeng maingato ti presio ti produktoda a tabako.

“Tunggal tripartite dumalan iti nakaing-inget a debate sa iti kamaudiananna, piso la ti pakaingatuanna idinto a bilion ti kitkitaen dagiti kompania nga agaramid iti sigarilio,” impalgak ti gobernador.

Linagidaw pay ti gobernador ti naangay a panagrali dagiti mannalon iti sango ti kapitolio dua a lawasen ti napalabas gapu ta nalawag daytoy a panangiyaw-awan tapno mailinged ti personal nga interes dagiti kompania.

Impalgak ni Singson a saan a naikoordinar kenkuana ti napasamak a rali ket nakakaasi dagiti mannalon gapu ta dida ammo ti husto a situasion.

“Nabayagen a agob-obserbarak mainaig iti daytoy a banag. Idi panawen ti kastila, naaddaanen iti monopolia ti tabako a saan a kinanunongan dagiti appotayo. Idi 1970s isu met dayta ti kinalabanko ta adda mayat a mangkontrol iti presio ti tabako. Iti panagtipon ti Philip Morris Philippines ken Fortune Tobacco, dakkel ti posibilidad a maulit manen ti monopolia. Masapul nga ilukattayon ti matatayo ket imutektekantayo ti husto a mapaspasamak iti industriatayo,” kinuna pay ni Singson.

Kinuna pay ti gobernador a saan a madanagan iti mabalin a pannakaapektar ti pinutarna a linteg a Tobacco Excise Tax Law wenno R.A. 7171 gapu ta no dumakkel ti buis a makolekta,  dakdakkel pay a kantidad ti mabingay dagiti tobacco producing provinces a mangitunda iti isasayaat ti biag dagiti mannalon iti tabako gapu ta mabalindanton nga idiktar ti kayatda a presio.

Innayon ni Singson a no agbalin a linteg ti nasao a gakat, mapan a P60 bilion ti makolekta a buis manipud iti tabako.

“Saanko a kayat a maisarsarak ti linteg a pinutarko. Ken saan met a kayat ti gobierno a maawan ti industria ti tabako a maysa kadagiti teddek ti ekonomia. No agbalin a patas ti buis iti sigarilio, umadu dagiti kompania ti sigarilio manipud sabali a pagilian tapno umay aggatang iti produktotayo ken agipatakder iti paktoriada ditoy. Ad-adu ngarud ti paglakuan dagiti mannalontayo,” innayon pay ti gobernador.

Kinuna ni Singson a saanna pay a nakapatang dagiti kongresista ken gobernador dagiti tobacco producing provinces ket bukodna a panirigan iti panangpaborna iti pannakaingato ti sin tax.

Indawat ketdi ti gobernador nga agriingen dagiti mannalon iti pannakailibayda iti panangilili dagiti cigarette manufacturers kadakuada.#