Footer

BANNER NEWS: Cooperative pharmacy, napaserraan

VIGAN CITY- Nagserran ti cooperative pharmacy iti uneg ti Gabriela Silang General Hospital ditoy.

Daytoy ti naammuan ken ni Dr. Winston Aguirre, hepe ti Gabriela Silang General Hospital iti telephone interview kenkuana ti Tawid News itay lawasna.

Segun ken ni Aguirre, madama ti inbentario dagiti stock ti agas iti nasao a kooperatiba ngem nagsardengen ti operasionna kas panagtungpal iti memorandum ni Gov. Deogracias Victor Savellano.

Nupay kasta, kinuna ti hepe a dina ammo no ania ti opsion ti nasao a kooperatiba, no ituloyna ti operasionna iti ruar ti ospital wenno ilakona ti stockna nga agas iti gobierno probinsial.

Iti kallabbes, masansan a mababalaw ti Gabriela Silang General Hospital gapu ta nanginngina dagiti agas a mailako iti uneg ti ospital ngem dagiti magatang kadagiti pribado a parmasiutika iti ruar.

Gapu iti daytoy, nagtignay ti gobernador tapno masolbar daytoy a problema ket inlungalongna ti pannakaipasdek ti botika ti probinsia tapno adda paggatangan iti nalaklaka nga agas ken kas economic enterprise dagiti district hospitals iti probinsia tapno dumakkel ti pamastrekanda.

Iti immun-una nga interbiona iti media, impalgak ni Gov. Deogracias Victor Savellano nga adda nagtulaganda kadagiti empleado iti ospital nga apaman nga ag-operate ti Botika ti Probinsia, agsardeng metten ti operasion ti negosio a parmasiutika iti uneg ti ospital.

Segun iti gobernador, nakidialogo kenkuana dagiti opisial ti kooperatiba ti parmasia ket inikkanna ida ti konsiderasion a maisardeng ti operasion daytoy agingga iti Disiembre 15, 2009 ngem limmabas ti nasao a petsa nga awan gargarawda isu a napan nakipatang kadakuada a mismo ni Atty. Maricel Tacata, ti manager ti Botika ti Probinsia.

“No ania ti napagtutulagan, isu ti masurot,” kinuna ni Savellano idinto nga innayonna a dua ti konsiderasion nga intanggayana: iyalis ti kooperatiba ti agas ti operasionna iti ruar ti ospital wenno gatangen ti gobierno probinsial dagiti stock ti agas daytoy tapno agsardengen ti operasionna.

Kinuna ti gobernador a “dapat lang” a maserraan ti nasao a kooperatiba ti parmasia iti uneg ti ospital ta isu ti napagsasaritaan ken agsipud ta adda conflict of interest ken maki-compete daytoy iti Botika ti Probinsia.#