BANNER NEWS: COP ti Sta. Lucia MPS, rinelibo ti PD

CAMP ELPIDIO QUIRINO, Bantay, Ilocos Sur – Imbilin ti provincial director ti temporario a pannakarelibo ti hepe ti polis ti Sta. Lucia, Ilocos Sur gapu iti mapapati a “biddutna” a nagtungpal iti pannakapapatay ti maysa a polis ken maysa a sibilian iti tiendaan publiko ti nasao nga ili idi napan a bulan.

Kinuna ni Provincial Director Police Senior Supt. Virgilio Fabros a temporario a rinelibona ti hepe ti polis ti Sta. Lucia, Police Chief Inspector Joseph Cabreros para iti nawaya nga inbestigasion mainaig iti pannakapapatay ni SPO3 Joffrey Palacio ken ni Melchor Angala a mapapati nga insayangkat ti maysa a soldado a kameng ti Phil. Army iti maysa a videoke bar iti rabii ti Abril 19.

Kanaig daytoy, binuangay ni Fabros ti Task Force Palacio  nga idauluan ti Provincial Ilocos Sur Criminal Investigation Detachment Team a mangisayangkat iti independiente nga inbestigasion ken intedna iti pangulo ti CIDG amin a resources tapno “malawlawagan, makita no ania a talaga ti napasamak iti nasao nga insidente.”

Kinuna ni Fabros a kas maibatay iti inisial a report manipud iti task force, napan da Cabreros, PO3 Trinidad, PO3 Baltic ken SPO3 Palacio iti Bayon’s Eatery and Videoke Bar ket pinainom ida ti akinkukua, ni Bobby Cortez.

Maysa nga agnagan iti Jake, mapapati a kameng ti tropa ti Phil. Army a kasangsangpet iti Catayagan, Sta. Lucia ti agin-inom iti sabali a lamisaan.

Mapapati a sineniasan ni Palacio ti soldado ket nagpatangda iti ruar. Nagsubli ti soldado iti uneg ket imbagana iti katebolna a babai nga adda areglarenna (aayusin).

Segun pay iti report, idi addan da Cabreros iti ruar, nagpaputok ti hepe iti namitlo wenno namimpat a daras.

Kalpasanna, segun iti maysa a sibilian, nakitana ti tallo wenno uppat a lallaki a simmangpet ket mapapati a bigla a pinaltoganda ni Palacio a naisina kada Cabreros.

“…Palpalutpoten ti task force no asino daytoy Jake ket ar-aramidenmi ti maiyataday a koordinasion tapno maala ti disposision dagiti tropa, no asino dagiti detachment a kasangsangpetna…,” kinuna ni Fabros .

Kinuna ti provincial director a mabalin a nag-panic ni Angala nga umin-inom iti sabali a videoke bar ket nagtaray ngem nairaman a napuntaan iti naiyaw-awan a bala.

Kinuna ni Fabros a malaksid a saan nga inreport ni Cabreros amin a napasamak, “definitely, adda panaglabsing” agsipud ta nakasibilianda iti kaaddada iti nasao a videoke bar idinto nga imbaga ti hepe a naka-visibility patrolda.

“Rebbengna nga awanda iti dayta a lugar, wenno saanda a nagbayag iti videoke bar a nagiinom,” kinuna ni Fabros sana kinuna a no kasual koma ti kaaddada iti dayta a lugar, kinitada laeng ti situasion, kinapatangda ti akinkukua ket idi naammuanda ti kaadda ti maysa a soldado iti uneg, kinasaritada koma iti nasayaat.

Maysa pay a kinuna ti provincial director a kitaenda no apay a nagpaputok ni Cabreros “idinto nga awan met ti rumbeng nga iwarningna didiay…”

Kinuna ni Fabros a nalpasen ti cartographic sketch ti agnagan Jake ket kinapatangnan ti dadaulo ti Phil. Army tapno maipakat ti ballistics examinations kadagiti tropa a naggapu iti detachment ti Catayagan, Sta. Lucia ken maitudo babaen ti line-up ti soldado a masuspetsa a nangpaltog ken ni Palacio.

Naammuan a nag-pull-out ti detachment iti Calatagan, Sta. Lucia iti kabigatanna kalpasan ti insidente.

“Awan ti kalubantayo no asinoman ti rumbeng nga agsungbat iti pannakapapatay da SPO3 Palacio ken ni Melchor Angala,” impatalged ni Fabros idinto nga inyunay-unayna nga “idaldalanda laeng iti proseso agsipud ta nakarigrigat a pagsuspetsaan ti sibubukel a detachment.” #