Footer

BANNER NEWS: Crime index iti Ilocos Sur, dimmakkel, crime efficiency rate, ngimmato: PPO

Vigan City – Immadu ti bilang dagiti napasamak a krimen iti Ilocos Sur  ita a tawen no maikumpara itay napalabas a tawen.

Daytoy ti naammuan iti report ti PNP Provincial Police Office babaen ken ni Police Supt. Maximo Torricer kabayatan ti Peace and Order Council meeting a naangay iti sangguniang Panlalawigan hall idi Hulio 24.

Segun iti report ni Torricer, addan 108 a pakabuklan a napasamak a krimen itay napan a tawen idinto nga iti umuna nga innem a bulan daytoy a tawen, addan 155 a napasamak a krimen.

Timmabuno iti nasao a miting da Col. Pompeyo Limbo ti 503rd Infantry Brigade, Lt. Col. Roy Devesa, Provincial Director Police Senior Supt. Virgilio Fabros, DILG Provincial Director Godofredo Martinez, sumagmamano a mayor, pannakabagi ti provincial social welfare office, ken non-government organizations.

Kinuna ni Torricer nga addan nailista a 58 nga index crimes ken 50 a non-index crimes idi 2007 idinto nga addan 76 index crimes ken 79 a non-index crimes a nairekord ti PPO ita nga tawen.

Nupay kasta, kinuna ni Torricer a ngimmato  ti crime efficiency rate ti probinsia ket manipud iti 82.4%, nagbalin nga 89% idinto a simmayaat pay iti 45.5% ti nasolbar a kaso no ikumpara itay napan a tawen.

Ti kinalukay ti hudisiaria ti itudtudo ti PPOC a makaigapu iti kinabassit dagiti makaskasuan a matiliw a nakaepekto iti estatistika dagiti masolbar a krimen.

Kanaiag daytoy, kinuna ni Gov. DV Savellano, PPOC Chairman,  nga agtitipon dagiti pillars ti justice system tapno maikkan iti naan-anay a solusion ti problema a makalapped iti pannakapaadda iti naan-anay nga urnos iti Ilocos Sur.

Napagnunumuan pay a naan-anayen a pannakaangay iti binulan a miting ti PPOC tapno maammuan a dagus ti progreso ti linak ken urnos ti probinsia.#