BANNER NEWS: Crime volume iti Region I, bimmaba: PRO1

VIGAN CITY – Bimmaba ti crime volume iti sibubukel a Rehion Uno ita a tawen no maikumpara iti isu met la a tiempo idi 2010, daytoy ti imbunannag ti Police Regional Office bayat ti Regional Peace and Order Council Meeting a naangay  ditoy siudad idi Marso 17.

Iti report ti pannakabagi ni Police Regional Director, Chief Supt. Franklin Jesus Bucayu iti RPOC, umabot iti 1,935 ti crime volume manipud idi Pebrero 28, 2010 agingga iti Pebrero 28 ita a tawen idinto a 2779 ti crime volume iti kastoy met la a panawen agingga iti Pebrero 28 idi napan a tawen, nababbaba iti 844.

Agdagup met ti kaso ti pammapatay a nakainaigan ti riding in tandem iti 71 ita a tawen, nababbaba no maikumpara iti 83 a pammapatay babaen met laeng kadagiti nagkalubbon iti motorsiklo iti kastoy met laeng a panawen idi napan a tawen.

Segun pay ti report,  63 nga armas ti nasamsam ti kapolisan agingga iti Pebrero 28 daytoy a tawen ken natiliwen ni Stephen Gavino a masuspetsa iti dua a pammapatay iti Ilocos Norte ken ni Felix Menor a napapatay bayat ti pannakilabanna kadagiti polis.

Lima metten ti natiliw a tattao iti innem nga operasion nga insayangkat ti kapolisan kontra carnapping; nakatiliwda metten iti 67 iti 14 nga operation kontra illegal a sugal, 13 ti naaresto iti illegal a panagkalap ken 15 iti illegal logging.

Adda metten 1,040,000 a pinuon ti marihuana nga agpateg iti P595 milion ti pinarutda, segun ti report.

Mainaig iti kampania maikontra iti insurhensia, naireport nga awan metten ti barangay nga apektado nupay adda 145 a barangay a threatened, 81 ditoy ti adda iti Ilocos Sur.

Kinuna ni Gov. Chavit Singson a masapul ti panagkikibin tapno matratar dagiti isyo mainaig iti linak ken talna kasta metten a masapul ti nainget a pannakaiyimplimentar dagiti linteg.#