BANNER NEWS: Daan a resibo, mabalin pay a mausar agingga iti Agosto 30: BIR

MANILA – Mabalin pay nga aramaten dagiti negosiante dagiti di pay nausar a daan a resiboda agingga iti agtapos ti Agosto daytoy a tawen, daytoy ti impakaammo ti Bureau of Internal Revenue itay nabiit.

Kinuna ni Commissioner Kim S. Jacinto-Henares nga insanud ti BIR ti deadline iti panangiyisio dagiti negosiante ken propesional iti baro nga opisial a resiboda kadagiti klienteda agingga iti Agosto kas maibatay kadagiti adu a kiddaw manipud kadagiti nadumaduma a pasdek-negosio ken dagiti propesional ken tapno maikkan dagitoy iti umdas a tiempo nga agpaimprenta kadagiti baro a resiboda.

Ngem inyunay-unay ni Henarez a sumango latta iti panagmulta dagiti negosio a saan a nakapagpila iti Authority to Print (ATP) idi Abril.

“ I did not move the deadline para mag-file ng application nung April 30. So, yong mga hindi nakapag-file may penalty pa rin,” kinuna ni Henares.

Kinunana nga adda 2,000 nga inikkan ti BIR iti akreditasion nga agimprenta  kadagiti baro a resibo.

Agmulta dagiti negosio a di nakapagpila iti ATP idi Abril iti P1,000.00 ngem dagiti negosio a saan nga agiyisio iti baro a resibo mangrugi inton Agosto 31 ket agmulta agingga iti P50,000.00.

Sakbay daytoy, nangiruar ti BIR iti baro a regulasion a isurender dagiti negosiante ken propesional amin dagiti saan pay a nausar nga opisial a resibo ken commercial invoices agingga iti Hunio 30, kasta met iti panagiyisioda iti baro a resibo ken invoices a naimprenta iti babaen dagiti accredited a printers ti BIR mangrugi iti Hulio 1.

Naituding a deadline ti panagipila iti authority to print idi Abril 15.

Ngem segun iti maysa nga agilinlinteg, saan a maikanatad ti deadline agsipud ta napakaammuan laeng dagiti maseknan nga agbaybayad iti buis maipanggep iti daytoy a paglintegan idi napan a bulan.

Kasta met a kinuna ti maysa nga opisial ti Philippine Exporters Confederation a saan pay a sisasagana dagiti negosio ditoy pagilian iti pannakaipakat ti implementasion ti Revenue Regulations No. 18-2012.

Ngem kinuna ni Henares a naiyisio pay la idi napan a tawen ti Revenue Regulations No. 18-2012 ken naipublikar idi Enero 3 , 2013 a nakaipakaammuan nga agpaso amin dagiti existing a resibo inton Hunio 30.

Kinuna ni Henares nga imparuarda ti nasao a regulasion a mangpukaw kadagiti daan a resibo tapno masuktanda kadagiti kabarbaro a naimprenta babaen kadagiti naakreditaran a printers tapno masullatan dagiti abut mainaig iti panagusar kadagiti mapagduaduaan a resibo a pakaigapuan iti panagpukaw ti kuarta ti gobierno iti binilion a pesos iti buis tunggal tawen.

Dinakamat pay ni Henares nga adda dagiti negosio a naipasdek laeng nga aglako kadagiti resibo kadagiti suitik nga establisimiento a pakairamanan dagiti ismaglers tapno maikalintegan ken mapagbalin a lehitimo ti pagtaudan dagiti negosio ken serbisio nga ilaklakoda.

Inlawlawag ni Henares a dagiti laeng accredited printers dagiti otorisado nga agimprenta kadagiti prinsipal ken supplementary receipts ken mangirehistro kadagitoy iti BIR sana innayon a maiparit ti panag-subcontract kadagiti proyekto kadagiti saan nga accredited a printers.#