BANNER NEWS: Dati a diputado Ronald Singson, saanen nga agsubli iti politika

VIGAN CITY – Ipamaysa laengen ni sigud a diputado ti Umuna a District ti Ilocos Sur Ronald Singson dagiti nabaybay-an a negosio ti pamiliana ket gibusannan ti kinapolitikona.

“Kaykayatkon a sanguen dagiti negosio a saan a naas-asikaso ken kasta met a kayatko nga ipapas ti pannakidennak iti anakko. Nupay kasta, sidadaanak latta a tumulong kadagiti kaprobinsiaak no asitgandak,” kinuna ti sigud a diputado bayat ti inangayna a press conference kalpasan ti isasangpetna ditoy probinsia idi Enero 14.

Kinuna ti dati a diputado a maragsakan gapu ta ti inaudi a kabsatna a ni Ryan ti nangsublat iti puestona iti Kongreso idinto nga impatalgedna nga ipaayna amin a kabaelanna a mangsuportar iti kabsatna.

Kinuna ni Singson nga idawdawatna laeng ken ni Ryan ti panangituloy daytoy kadagiti proyekto a saanna a nairingpas gapu iti pannakakonbiktarna iti kaso a panagikut iti droga sadiay Hong Kong.

Nagyaman pay ni Singson kadagiti amin a simmuporta kenkuana bayat ti pannakausig ti kasona idinto nga innayonna a napakawanna metten dagiti nakaigapu iti pannakaibaludna kasta metten dagiti kakaduana iti Kongreso a nangbaybay-a kenkuana.

Aminado ti sigud a diputado a saan a nalaka ti nagpasaranna bayat ti pannakaibaludna iti nasurok a makatawen ket agsipud ta awan ti special treatment iti uneg ti pagbaludan, napadasanna ti agtrabaho ken mangan kas gagangay a balud.

“Napadasak ti agdait iti bedsheets iti inaldaw ta daydiay met ti naitoka kaniak. Ti rigatna, talaga a kimmuttongak gapu iti makan. Naynay a congee ken tinapay laeng ti pangaldawmi,” insalaysay ni Singson.

Inaramat ni Singson ti gundaway a nangipalgak no ania a talaga ti napasamak iti daydi aldaw a pannakatiliwna sadiay Hong Kong. Ti kan gayyemna a kaduana kadagidi a gundaway ti adda kargana a cocaine ngem impaiggem daytoy ti bote a naglaon iti droga idi maduktalan iti airport, isu nga addan iti ikutna daytoy idi agpalutpot dagiti autoridad. Kapilitan kan metten nga inaminna a kukuana ti droga gapu ta isuna ti makin-iggem iti daytoy. Suhestion dagiti abogadona ti panangaminna tapno lumag-an ti maipataw a pannusa kenkuana.

“No adda man nasayaat a naited ti napasamak kaniak, isu ti ad-adda a pannakaiyasidegko iti Namarsua gapu ta isu ti nangted iti kired kaniak aglalo kadagiti immun-una a bulan a kaaddak iti uneg ti pagbaludan. Didiayko a nabasa ti sibubukel a linaon ti Biblia,” kinuna pay ni Singson.

Manipud iti isasangpetna iti Manila a naggapu iti Hong Kong, naglugan ti dati a diputado iti private plane a nagtarus iti Ilocos Sur,  kaduana ti amana a ni Gov. Chavit Singson.

Simmabat iti Vigan Airport dagiti kakabsatna, dagiti opisial ti nadumaduma nga LGUs, kakabagian, gagayyem ken dagiti kameng ti nailian ken lokal a media. Maysa a misa a pagyaman ti naipaay kenkuana iti kapilia iti Baluarte kalpasanna.#