BANNER NEWS: DILG officer napilidan kalpasan a nakidinnungpar ti luganna?

MAGSINGAL, Ilocos Sur – Umad-adu dagiti saludsod mainaig iti pannakatay ti maysa a DILG officer iti sanguanan ti panagduadua ti pamilia ti DILG officer gapu iti kagrabe unay dagiti dunor a sinagrap ti biktima.

Iti interbio ti Barangay Commando Brigada  a naipatangatang iti DWRS idi Enero 17, impeksa ti step daughter ni Caoayan DILG Officer Benigno “Jerry” Rabe Guerrero, 43, naasawaan, residente iti Barangay Lira, San Juan, Ilocos Sur, ti suspetsana a napilidan ti amana gapu iti nakitana a nakaro unay a sinagrap daytoy a dundunor.

Naideklara a dead on arrival ni  Guerrero iti Magsingal District Hospital a nakaitarayanna kalpasan a mapapati a nakidinnungpar ti motorsiklona iti maysa a Ford wagon sadiay Sitio Bossaoit, Barangay San Clemente, Magsingal idi agarup apaglabes ti 11:00 ti rabii ti Enero 16.

Segun iti inisial a report ti polis ti Magsingal, agpaamianan a direksion ti Honda XRM a motorsiklo a minaneho ni Guerrero idi nakidinnungpar iti maysa a wagon a minaneho ti maysa a Luciano Mate Pascua Francisco, 49, naasawaan, residente iti Laoag City.

Segun ken ni COP Lucio Disierto, Jr., kas maibatay iti panagimbestigada, kimmaut ti lugan ti DILG officer iti linia ti wagon a puon ti nakasapgidanna ken nakaipalladawan ti biktima iti tengnga ti kalsada.

Saan a naan-ano ti drayber ti wagon agraman dagiti walo a pasaherona.

Nakaro ti pannakadadael ti motorsiklo. Nadadael met ti makannigid a bumper ti wagon ken ridaw iti abay ti drayber, nabuong ti headlight,  ti sarming iti batog ti driver’s seat,  windshield ken side mirror.

Mapapati a napalabas ti maysa nga oras kalpasan ti pannungpar sa naitaray ti biktima iti Magsingal District Hospital.

Iti post mortem examination ti doktor iti bangkay, naburak ti bangabangana, nalulo ti rupana, simmalto ti maysa a matana, adda fracture ti pangana, adu ti fracture kadagiti akinngato nga ima ken makannigid a sakana.

Kinuna ni Disierto a kas maibatay ti panagimbestigada, dagiti dunor ti biktima a sinagrapna ket resulta ti napigsa nga impact ti panagdinnungpar dagiti lugan ken iti pannakaipalladawna.

Kinuna pay a saan a napilidan ti DILG officer agsipud ta awan ti nakitada a lemma ti pilid iti bagi ken ulo ti biktima.

Kinuna pay ti COP a nasarakanda a naipalladaw ti helmet a mapapati nga inaramat ti biktima iti saan nga adayo ti nakapasaganna.

Ngem kinuna ti step daughter nga uray kasano kapigsa ti impact ti pannungpar, saan a mamati a kasta unay ti kagrabe dagiti dunor ti amana.

Iti met interbio ni Jun Ramos ken ni Dr. Ronald Tobias, ti doktor a nangtaming iti biktima, kinunana nga iti kaadun dagiti tinamingna nga insidente ti panagdinnungpar dagiti lugan, kaadduanna a natukkol dagiti tulang ti biktima, saan a naburbor a kas iti sinagrap ti DILG officer.

“…Most probably a napilidan… nupay awan dagiti tire marks,” kinuna ni Tobias.

Idi madamag no nakainom ti biktima idi maaksidente, kinuna ti doktor a maysa nga oras ti napalabas sakbay a naitaray daytoy iti ospital ken awananda iti instrumento a pangrukod iti alcohol content ti dara.

Agtultuloy ti panagimbestiga dagiti polis mainaig iti pannungpar.#