BANNER NEWS: Droga kitkitaen kapolisan a motibo iti Lim slay

BANTAY, Ilocos Sur – Droga ti maysa nga anggulo a kitkitaen dagiti inbestigador a motibo iti pammapatay a naisayangkat sadiay Zone 4, ditoy nga ili idi apaglabes ti ala una ti parbangon idi Agosto 13.

Kinuna ni Bantay Chief of Police Andrew Rabang a nakarekobre dagiti inbestigador iti ikut ni Mark Lim y Dela Cruz, 36, naasawaan, ken residente iti Barangay Paoa, Vigan City, iti uppat a sachet a naglaon iti mapapati a shabu, maysa a selpon a Samsung ken P47,802.00 a kuarta iti nadumaduma a denominasion.

Kinuna ni Rabang nga iti panagimbestiga dagiti polis iti crime scene, nakarekobreda pay iti PT 100 AFS Cal. 40 pistol nga addaan iti SN SAP80652 nga addaan laser ken magasin a nagkarga iti 6 bala iti ikut ni Lim.

Innayonna a naipatuloden iti Provincial Crime Laboratory Office para iti pannakaamirisda ti narekobreda a 3 a kapsula ken maysa a deformed slug ti cal. 45 iti nakapasamakan ti krimen agraman ti paltog ni Lim no naiputok wenno saan.

Nupay nangiwayat ti kapolisan iti dragnet operation ken napakaammuan dagiti police stations a kaparanget ti Bantay police station, negatibo ti resultana.

Kinuna ni Audrey Jacob y Orot, 27, guardia iti St. Paul College of Ilocos Sur ken ni Richard Ventura y Cirilo, 39, a nakangegda iti nagsasaruno a tallo a kanalbuong ti paltog iti provincial road a sakup ti Zone 4, partikular ti nagbaetan ti St. Paul College of Ilocos Sur ken ti DPWH ket madamdama ti ungor ti motorsiklo a napaspas ti tarayna a nagpalaud manipud iti crime scene.

Mapapati nga adda ti biktima iti uneg ti luganna a Nissan Vanette a nakaparking iti kalsada iti nagbaetan ti SPCIS ken DPWH compound idi mapapatay.

Nagsagrap ni Lim kadagiti dunor iti tian ken makannigid a sikona ket nupay naitaray iti Metro Vigan Cooperative Hospital, indeklara ti doktor a nangtaming kenkuana a dead on arrival.

ni Rabang a kitkitaenda no adda pakainaigan dagiti mensahe a naawat ni Lim iti pannakapapatayna.

Innayon ni Rabang nga uray idi napapatayen ni Lim, adda pay dagiti text messages a naawat ti biktima ket dagitoy ti ar-arisitenda nangruna dagiti mainaig iti droga.#