BANNER NEWS: Drug personality, 3 kakaduana, natiliw iti pot session

CABUGAO, Ilocos Sur – Nakaeskor ti kapolisan iti imminget a kampaniana maikontra iti droga iti pannakaaresto ti maysa a masuspetsa a drug personality ditoy nga ili ken tallo pay a kakaduana idi sardam ti Enero 9.

Iti daytoy nga operasion, dakkel a bunggoy ti elemento ti kapolisan a pakaibilangan ti Cabugao MPS, RIU-1 (PIT) PAIDSOTG, CIDG, PIB, PDEA, ISPPSC, NISG-NL,NISF, 73RD MICO, 7ID,PA, ISCIDT, MIG 1 ISAF302nd AISS, 300TH nga indauluan ni Cabugao Chief of Police Chief Inspector William Nerona ken babaen ti superbision ni Acting Provincial Director Senior Supt. Nestor Eswagen Felix, ti napan nangaresto ken ni Abelardo Tinaza y Sinco, 44, naasawaan, ken residente iti Barangay Pug-os, Cabugao babaen ti bileg ti warrant of arrest nga inyisio ni Judge Nida Bringas Alejandro ti Regional Trial Court Branch 24, Cabugao, Ilocos Sur.

Sumangsango ni Tinaza iti kaso a panaglabsing iti Section 11 ken 12 ti RA 9165 a nai-docket iti babaen ti Criminal Case No. 3146-K ken 3147-K ket nairekomenda nga agpiansa iti P200,000.00 ken P60,000.00.

Sakbayna, nasalamaan ti kapolisan da Tinaza ken tallo a kakaduana a nabigbig a da Dennis Baclig y Lacuesta, 44, naasawaan; Besame Castillo y Baclig, 53, naasawaan; ken Renato Basuil y Castillo, 40, residente amin iti Barangay Pug-os, Cabugao, Ilocos Sur, a mangisaysayangkat iti pot session iti uneg ti balay ti akusado.

Pinadas dagiti suspek ti naglibas ngem kinamat ida dagiti polis a nagresulta iti pannakatiliwda ken pannakakumpiska iti ikutda dagiti kontrabando ken parapernalia ti droga.

Nakumpiska iti ikut ni Tinaza ti maysa a black pouch a mapapati a naglaon kadagiti sumaganad: plastic ice bag a mapapati a naglaon iti puraw a crystalline granules; air gun cal. 33; maysa a live ammunition para cal .22; maysa a cal 380 nga addaan magasin nga addaan iti serial number DK703565, walo a bala para cal 380; tallo a glass tubes; maysa a nangisit a wallet; 5 a sag-P200.00; 24 a sag-P100.00; 4 a sag-P50.00; 5 a sag-P20.00; ken maysa a $20.00.

Nakumpiska met ken ni Baclig dagiti sumaganad: maysa nga small pouch; 3 a medium heat sealed plastic sachet a naglaon iti mapapati a nagango a bulong ti marihuana; ken maysa a lighter.

Iti met ikut ni Basuil, nakumpiska dagiti sumaganad: maysa a medium heat sealed transparent plastic sachet a naglaon iti white crystalline substance a masuspetsa a shabu; dua a lighter; ken dua nga open medium heat-sealed transparent plastic sachet a nagkarga iti masuspetsa a shabu residue.

Naala met ken ni Baclig ti maysa a medium heat-sealed transparent plastic sachet a nagkarga iti mapapati a shabu; maysa a lighter; ken maysa a plastic scoop a naaramid iti straw a masuspetsa a naglaon iti shabu residue.

Naipan dagiti suspek agraman dagiti nakumpiska kadakuada iti Cabugao police station para iti umisu a dokumentasion ken disposision.#