BANNER NEWS: Economic enterprises ti Vigan City, ngimmato ti napastrekda

VIGAN CITY – Dimmakkel ti napastrek dagiti tallo nga economic enterprises ditoy siudad idi napan a tawen no maikumpara kadagiti napalabas a tawen, daytoy ti report manipud iti  Strategic Planning Workshop a naangay iti Taguig City itay nabiit.

Insayangkat ti gobierno ti siudad nga indauluan ni Mayor Eva Marie Singson-Medina ti nasao a workshop tapno mapunnuan dagiti gaps iti performance tunggal opisina.

Kinuna ni Medina nga idi kanikatlo a tawen, adda dagiti nai-set nga objectives a gun-oden dagiti nadumaduma nga opisina ket nakitada nga adda dagiti opisina a narimbawanda pay dagiti puntiriada a gun-oden ngem adda met dagiti opisina a saanda a nagun-od ti objectivesda.

“Masapul a kitaentayo a dagiti gaps para iti sumaruno a tallo a tawen ket mapunnuantayo ken maaramidtayo pay dagiti intudingtayo para iti sumaruno a tawen,” kinuna ni Medina.

Segun iti report, dimmakkel ti napastrek ti tiendaan publiko, slaughterhouse ken ti minibus and jeepney terminal ditoy siudad a pagtataudan dagiti pondo ti gobierno ti siudad para kadagiti nadumaduma a proyektona, malaksid iti tinawen nga aw-awatenna nga internal revenues allotment manipud iti national government.

Idi napan a tawen, nakapastrek ti tiendaan ditoy siudad iti P27 million, dakdakkel nga amang ngem ti napastrekna idi 2011 nga agdagup iti P23 million ken idi 2010 nga agdagup iti P24 million.

Inlawlawag ni Bonifacio Corpuz, market master ditoy siudad, a dakdakkel ti nakolektada idi 2010 ngem idi 2011 agsipud ta adu dagiti kinolektada a penalties manipud kadagiti stall owners.

Innayon ni Corpuz a puntiriada ti makakolekta iti P32 milion iti daytoy a tawen.

Dimmakkel met ti napastrek ti slaughterhouse ditoy siudad.

Kas maibatay iti report, itay napan a tawen, simmuyop ti nakolekta ti slaughterhouse iti P10 million manipud iti P5.63 million a nakolektana idi 2011. Idi 2010, sumurok laeng a P4 million ti nakolekta iti slaughterhouse.

Iti sabali a bangir, dimmakkel met ti napastrek iti Vigan Bus and Jeepney Terminal idi napan a tawen no maikumpara dagiti koleksionna iti napalpalabas a tawen.

Nakapastrek ti nasao a terminal iti P4.33 million idi 2012, idinto a P3.68 million ti napastrekna idi 2011 ken P3.87 million idi 2010.

Kinuna dagiti eksperto a dimmakkel ti napastrek ti tiendaan agsipud ta immadu dagiti aglako ken negosiante nga agnegosio ditoy. Iti met slaughterhouse, maitudo a ti umad-adu a maparti a dingnguen gapu iti dumakdakkel a demand manipud kadagiti aggatang iti karne a pakaibilangan dagiti restaurant ken dadduma pay a panganan agsipud iti umad-adu a bilang dagiti turista nga agpasiar iti siudad.

Kinuna pay dagiti eksperto a dimmakkel met ti napastrek iti Bus and Jeepney Terminal agsipud iti pannakaipalubos dagiti public utility vehicles wenno van nga agbiahe manipud Vigan agingga iti Tagudin ken San Fernando City ken agidiskarga kadagiti pasahero iti terminal.#