BANNER NEWS: Estudiante, nakumpiskaan iti backpack, bag a naglaon marihuana

ALILEM, Ilocos Sur – Maysa a mapapati a grupo dagiti agibibiahe iti maiparparit a droga ti natnag iti ima dagiti polis kalpasan a nakumpiska iti ikut ti maysa ti backpack ken plastic bag a naglaon iti marihuana babaen ti naisayangkat a police operation sadiay Barangay Dalawa, ditoy nga ili idi bigat ti Hulio 14.

Iti report ni Police Inspector Eduardo Mutong, Deputy Chief of Police, kinunana a nangipasdekda iti checkpoint kalpasan a nakaawatda iti impormasion manipud iti maysa a concerned citizen nga adda ibiahe a maiparparit a droga dagiti di nainaganan a suspek a naglugan iti Euro motorcycle a kolor nalabaga.

Kinuna ni Mutong a nakikoordinarda iti PDEA, ROI babaen ti selpon sada nangipasdek iti checkpoint iti pagdalanan dagiti suspek idi agarup 11:30 ti bigat ti nadakamat a petsa.

Awan ti napalabasda a nalabaga a Euro a motorsiklo.

Sabali manen nga impor-masion ti naawatda a nangipakaammo a limmabasen ti motorsiklo iti checkpoint ngem awan ti backrider ta dimsaag daytoy iti sanguanan ti maysa a barangay hall.

Dagus a nagturong dagiti polis iti nadakamat a lugar ket nakitada ti suspek a nakatugaw iti asideg ti maysa a traysikel.

Inasitgan dagiti polis ti suspek ket bayat ti panagsaludsodda, nadlawda a saan a makaidna daytoy ken nakitada ti maysa a backpack ken plastic bag a nailemmeng iti uneg ti traysikel.

Idi dinamag dagiti polis no asino ti akinkukua iti backpack ken bag, inannugot ti suspek a kukuana dagitoy.

Nakasukain dagiti polis iti saggatlo a bricks ti napagango a fruiting tops ti marihuana ken gourd shaped suspected dried marihuana fruiting tops a nabungon ken nareppet iti tape, a mapattapatta nga agdagsen iti sumurok-kumurong a 5.4 kilos nga agbalor iti P18,900.00.

Inimbitaran dagiti polis ti suspek a mapanda iti police station ket bayat ti kaaddada iti patrol car, mapapati a boluntario nga inannugot ti suspek a naglaon ti backpack ken plastic bag iti napagango a bulong ti marihuana.

Iti dayta met la a kanito, inaresto dagiti polis ti suspek a nabigbig idi agangay a maysa nga Aliven Sison y Damortes, 19, high school student, baro, ken residente iti Barangay Kapaya, Bakun, Benguet,  sada imbaga dagiti kalinteganna.

Karaman nga inaresto dagiti polis ni Emeterio Dagwasi, uliteg ni Sison, ken nagmaneho iti motorsiklo.

Kalpasan ti medikal a pannakaeksamenna iti Tagudin General Hospital and Capillariasis Center, naipan ti suspek agraman dagiti nakum-piska a backpack ken plastic bag iti crime laboratory iti Police Region Office 1 para iti pannakaamirisda.#