BANNER NEWS: Gawad Pagkilala, naipaay iti Ilocos Sur provincial government

VIGAN CITY – Gapu kadagiti programana a mangpadur-as iti sektor dagiti mangngalap, naipaayan iti pammadayaw ti gobierno probinsialitay nabiit.

Kinuna ni Bokal Pablito Sanidad, Jr. a napadayawan ti gobierno probinsial iti Gawad Pagkilala gapu kadagiti ordinansa nga impasa ti sangguniang panlalawigan a pakaibilangan ti ordinansa a mang-regulate iti panagkalap iti ipon, mang-regulate iti panagkalap iti ludong, ken iti pannakaipasdek ti fish quarantine a mangprotektar iti livelihood dagiti mangngalap.

Segun ken ni Sanidad, paborito a sida daydi Presidente Ferdinand Marcos ti ludong, a maysa kadagiti kanginaan a lames nga agbalor manipud iti P2,500-P3,000 kada kilo ken maibilangen a maysa kadagiti endangered specie ti lames iti Kailokuan.

Kinuna ni Sanidad a babaen ti pannakaipasdek ti checkpoint iti Sinait, Narvacan, ken Tagudin, masiputan dagiti fish products a sumsumrek iti probinsia manipud kadagiti sabali a probinsia.

Kinuna ti bokal nga imbes a gatgatangentayo dagiti lames nga aggapu iti bukod a karayan ti sabali a probinsia, napimpintas a datayo laengen ti mangsuplay kadagiti kasapulan a lames a gatangen iti probinsia tapno adda agpaay a livelihood dagiti mangngalap iti Ilocos Sur.

Kinuna ti chairman ti committee on agriculture a dagitoy nga impasa a linteg ti sangguniang panlalawigan ti nagbatayan ti Bureau of Fisheries and Aquatic Resources (BFAR) a nangited iti pammadayaw iti gobierno probinsial.

Kinuna pay ni Sanidad a paneknekan daytoy nga award a ti gobierno probinsial ket sisasagana ken siaannugot a tumulong kadagiti napipintas a programa ti BFAR para kadagiti mangngalap.

Malaksid iti probinsia ti Ilocos Sur, inawat met ti LGU-Cabugao, Vigan City, ken UNP Laboratory School Science Club ti Gawad Pagkilala Group Category.

Inyawid pay ti Ilocos Sur Polytechnic State College ti Sta. Maria Campus, LGU-Sto. Domingo, ti Maritime Police Station, ken ti Barangay Mindoro, Vigan City ti Gawad Pasasalamat Group Category .

Inyalat pay ti LGU-Sinait babaen ti Barangay Dadalaquiten Sur Fish Sanctuary ti Healthiest Fish Sanctuary; idinto a kaadduan met iti bilang iti rehistrado a mangngalap ti LGU-Sta. Cruz.

Kadakkelan ti insalipna a lames ti Luba Fishermen’s Association ti Sta. Lucia, idinto a second runner-up iti cooking contest ti Suksukit RIC ti Sto. Domingo, ken karaman iti top 3 ti Lussoc, Sto. Domingo iti sabali pay a pasalip.

Kanaig daytoy, maysa a resolusion ti impasa ti sangguniang panlalawigan a mangipaay iti komendasion kadagiti napadayawan nga LGUs ken NGOs.#