Footer

Banner News: Gobernador, grupo dagiti doktor, nagpinnirma manipesto kontra panagsusop iti sigarilio

SALCEDO, Ilocos Sur – Maysa a manipesto ti pinirmaan ni Gov. Deogracias Victor Savellano ken ti Ilocos Sur Medical Society (ISMS), saan a maikontra iti panagmula iti tabako no di iti dakes nga itden ti panagsigarilio wenno panagtabako.

“Adda daytoy anti-smoking manifesto nga insayangkat ti Philippine Medical Association kas kampania kontra iti panagsigarilio,”  kinuna ni Dr. Gloria Lahoz, presidente ti ISMS, idinto nga innayonna a maiyalubog ti manipesto a pinirmaan ti gobernador ken ti gunglo nga idauluanna iti kampania ti gobierno maikontra iti panagsusop iti sigarilio a mangipapaay kadagiti nakaro a makapatay a sakit.

Kinuna ni Lahoz a naibatay iti maysa a direktiba a makikoordinarda kadagiti lokal a gobierno iti kampania maikontra iti panagsusop iti sigarilio ket nakikammayyetda iti provincial level babaen ken ni Savellano “tapno mapasardeng ti panagsigarilio, tapno maibasbassit wenno mapasardeng ti kampania iti tobacco smoking.”

Indagadag ni Lahoz ti nainget a panangsuportar iti pannakaiparit iti anunsio, promosion ken sponsorship iti tabako, kas sagudayen ti Rep. Act 9211.

Nupay kasta, idi madamag no karaman iti kampania ti panagmula iti tabako a kangrunaan a cash crop dagiti mannalon iti Ilocos Sur, inyunay-unay ni Lahoz a saan a nairaman daytoy iti napirmaan a manipesto.

“Saan a naibaga ditoy ti panagmula ti tabako… it has nothing to do with planting of tobacco,” kinuna ni Lahoz.

Kinuna pay ni Lahoz nga inadal a nalaing ti gobierno probinsial ti nasao a manipesto sakbay a pinirmaanna agsipud ta maysa ti Ilocos Sur nga agparpartuat iti tabako.

Nakalanad iti manipesto a 20,000 nga ubbing a Filipino ti manamnama nga agsagaba kadagiti sakit nga adda pakainaiganna iti panagsigarilioda iti kinaganusda. Sangapulo a Filipino ti manamnama a pumusay gapu iti tobacco-related a pannakatay tunggal 60 a minutos.

“Ngarud, tarigagay ti pribado a sektor, nangruna ti medikal a propesion, iti pannakasalaknib iti kalintegan iti salun-at dagiti tattao,” kinuna ni Lahoz.#