Footer

BANNER NEWS: Gobierno probinsial, nagiwaras iti relief goods kadagiti biktima ni Bagyo Karen

VIGAN CITY – Dagus a nangiwayat ti gobierno probinsial kadagiti relief operations tapno  masaranay dagiti residente iti probinsia a naapektaran ti bagyo Karen.

Agdagupen iti sangapulo ket uppat dagiti ili a nagibunongan ti Opisina ti gobernador ken ti Provincial Social Welfare and Development Office kadagiti relief goods.

Walopulo a kaban a bagas, 54 a karton ti noodles, 50 a karton ti sardinas, 55 a karton ti kape, 50 a karton ti pork and beans ken 50 a karton ti sausage ti  personal nga inyarayat ni Gov. Deogracias Victor Savellano kadagiti biktima ti bagyo iti ili a Galimuyod, Sta. Lucia, Sta. Cruz, Santiago, San Esteban, Sta. Maria ken Santa iti maikadua a distrito; Sta. Catalina, San Vicente, Sto. Domingo, San Juan, Bantay, Cabugao ken Caoayan iti umuna a distrito.

Iti inisial a report dagiti municipal social welfare and development officer ti tunggal ili,  adda 7,655 a pamilia a buklen ti 26,416 a katao ti nakaro a nadidigra iti iduduprak ti bagyo Karen.

Iti immuna a report a naawat ti provincial social welfare and development office, kakaruan a naapektaran ti ili ti Sta. Maria gapu iti pannakalayus ti 20 a barangay a nakadidigraan ti 2,000 a pamilia; ti Sta. Lucia, 12 barangays ken 1,611 pamilia; ti Santa, 10 barangay ken 937 pamilia; ken ti Caoayan, 10 barangay ken 464 pamilia; San Esteban, 9 barangays ken 400 pamilia; ken Sta. Catalina, 9 barangays, 250 pamilia.

Uppat a tao ti naireport a nalmes ken mapukpukaw gapu iti pannakaiyanudda iti napigsa nga agus.

Iti Aragan, Cabugao, naiyagus ni Jose Tabia, 42, bayat ti panagballasiwna iti karayan idi Agosto 20. Narekobre ti bangkayna iti igid ti karayan ti Alinaay, Cabugao.

Iti Bique-walin, Lidlidda, naiyanud ni Gladys Buis, 13, idi mapanda iyalis dagiti tarakenda a kalding iti nangatngato a disso. Nairaman a naiyagus ti inana, ni Leticia, ngem nakapaigid.

Di pay nabirokan ti balasitang.

Dua pay a residente iti Barangay Rancho, Santa, Ilocos Sur, da Raymund Ancheta, 18, ken Agripino Cabalar, 22, ti naireport a naiyanud iti agos idi ballasiwena ti karayan.

Iti immuna a report, mapan koma umuraga dagiti dua iti karne ti nalmes a dingnguen. Ngem naammuan a napan gayam nagurnong dagiti dua kadagiti gabat a naitakdang iti igid ti baybay ket ginuyod ida ti napigsa a koriente.

 Saan pay a nasarakan dagiti dua.

Mapapati a nasaripatpatan dagiti dua nga agkatangkatang iti kabaybayan a sakup ti Biao, Sta. Maria ken iti Cabugao ngem saan a maarayat dagiti residente agsipud iti kadakkel ti dalluyon.

Gapu iti nagpatnag a panagindurog ti tudo iti rabii ti Agosto 19, nagreggaay ti bantay iti asideg ti Girl Scout building iti Banaoang a nakataktakan ti panagbiahe dagiti lugan iti sumagmamano nga oras.

Aganay met a P15 milion ti pategna dagiti  pagay ken mais ti nadadael ti bagyo.#