Footer

BANNER NEWS: Gobierno ti siudad, nakasaganan a mangselebrar maika-250 a tawen ti Nueva Segovia,…

VIGAN CITY -Kinuna ni Mayor Eva Marie S. Medina a nadumaduma nga aktibidad ti naisaganan ti gobierno ti siudad ditoy tapno naballigi ti pannakaselebrar ti maika-250 a tawen ti diocese ti Nueva Segovia ken daytoy a siudad.

Kinuna ni Medina a maysa kadagiti naipangruna nga aktibidad ti selebrasion ti pilgrimage manipud Lallo, Cagayan nga agsaltek iti Vigan City.

“Maysa a krus ti agbiahe manipud Lallo nga agturong iti Vigan kas simbolo ti pannakaiyalis ti dioses (Nueva Segovia) manipud Lallo a mapan Vigan,” kinuna ni Medina idinto nga innayonna a kuyogento dagiti bikers ti krus iti panagbiahena.

Naammuan iti mayor a maangay ti nasantuan a misa iti Lallo iti Septiembre 2 ket sabalinto manen a misa ti maangay inton Septiembre 7 iti Vigan City.

Maaramidto pay ti reenactment iti pannakaiyalis ti dioses ti Nueva Segovia ken ti pannakailibut ti krus nga agtungpal iti maysa a seremonia iti sanguanan ti arzobispado santo ti pannakaangay ti misa iti Saint Paul Cathedral.

Sabali pay nga aktibidad ti aggigiddan a pannakaimula 2,500 a seedlings babaen dagiti 2,500 a pamilia, kinuna ti mayora.

Naiyalis ti dioses ti Nueva Segovia manipud iti Lallo, Cagayan iti Vigan City idi Septiembre 7, 1758, dua gasut ket limapulo a tawenen ti napalabas.

Kinuna ni Medina a naiyalis ti dioses ti Nueva Segovia manipud Lallo, Cagayan babaen ti royal decree ket nakalanad iti nasao a decree nga agingga a ti Vigan ti tugaw ti diocese ken nakatakder ti katedral, agtalinaed a siudad ti Vigan.

Addanto pay maaramid a commemorative marker para iti siudad ken ti diocese, kinuna ni Medina.

Kabayatanna, manamnama ti pannakapirma ti memorandum of agreement mainaig iti mabuangay a Metro Vigan Coordinating Council inton Septiembre 8, aldaw a panangselebrar iti  Heritage Cities Solidarity Day.

Pito nga ili ken maysa a siudad a pakaibilangan ti Vigan City, Bantay, Caoayan, Santa, San Vicente, Sta. Catalina, San Ildefonso ken Sto. Domingo ti mangbukel iti Metro Vigan Coordinating Council.

Itay Agosto 13 ken 14, naangay ti strategic planning workshop a tinabunuan dagiti walo a mayor, walo a bise mayor ken saggapat a konsehal tunggal ili tapno isaganada ti memorandum of agreement ken tapno tratarenda no ania dagiti areas of cooperation a maaramid iti nagbabaetan dagiti  ili nga agkameng iti nasao a konseho.

Iti immun-una nga interbiona iti radio, kinuna ni Medina a ti memorandum of agreement ti pagibasaranto iti panangidawatda ken ni Cong. Ronald Singson a maidatag ti maysa a gakat iti Kongreso a mamagbalin a maysa a linteg ti MVCC tapno maikkan daytoy iti legal a personalidad.

Kinuna pay ti mayora a no adda linteg a mangbayabay kadakuada a makimiembro, nalaklakanton ti implementasion ti aniaman a cooperative activities, proyekto wenno programa.

Kinuna met ni Vice Mayor Franz Ranches a maysanto a grouping ti MVCC (ket) “saanto a patangan ti traffic wenno peace and order, patanganto pay iti economic and social development ti kada maseknan nga ili ti maikkan iti importansia.”

Kinuna ni Ranches nga aglasat ti MVCC iti transition period nga agpaut iti maysa ket kagudua a tawen wenno dua a tawen para iti capability building activities ti konseho ken “addanto proseso a masurot tapno mapapintastayo ti operasion ken organization structure ti MVCC.#