Footer

BANNER NEWS: Gov. Chavit saanen nga agkandidato, Cong. Ryan ipasangona para gobernador

VIGAN CITY – Iti saan a ninamnama nga addang ni incumbent Governor Luis “Chavit” Singson, inkeddengna a saanen nga agpailayon iti puestona ket ni Congressman Ryan Luis Singson ti ipasangona a kumandidato a para gobernador iti eleksion inton Mayo 2013.

Kasta met nga imbes a ni Congressman Ryan Singson ti agkandidato a para diputado iti umuna a distrito, agsubli ni dati a Congressman Ronald Singson iti puesto a binakanteanna maigapu iti kaso ti droga a nakainbolbaranna iti Hong Kong a nakaigapuan ti pannakabaludna iti makatawen ken innem a bulan.

Uray dagiti agpalpaliiw iti politika ditoy probinsia ken dagiti kameng ti media a nagur-uray iti panangipila ni Gov. Singson iti kandidaturana iti Comelec provincial office, saanda a ninamnama daytoy a desision ti bangolan a politiko.

Immuna a nagipila iti kandidaturana para congressman iti umuna a distrito ti Ilocos Sur ni Randy Singson, nagkonsehal iti Vigan ngem kalpasan ti panagpatangda nga agama, inakkal daytoy ti COCna sa nagipila ni dati a Congressman Ronald Singson iti sertipiko ti kandidaturana a kas opisial a kandidato ti Bileg Party, partido ti agdama a gobernador.

Kasango ni Congressman Ryan Singson ni Tagudin Mayor Roque “Jun” Verzosa nga immuna a nagipila iti kandidaturana para iti kinagobernador iti babaen ti Liberal Party.

Agpailayon met ni agdama a Vice Gov. Deogracias Victor “DV” Savellano ket agbalubalda manen ken ni dati a Bokal Efren Rafanan, Sr., nga agtaray a katiket ni Verzosa iti babaen ti Liberal Party.

Ni met Bertrand Baterina, ti kasupanget ni dati a Congressman Ronald Singson para iti kinadiputado iti umuna a distrito.

Iti kallabes, nagsangon dagiti dua iti nadakamat a puesto ngem saan a nabaelan ni Baterina nga imbalat ni Singson.

Agsubli met ni dati a House Deputy Speaker Eric Singson iti politika ket kumandidato para diputado iti maikadua a distrito iti babaen ti Liberal Party. Sumango kenkuana ni Henry Capela nga agtaray iti babaen ti Aksyon Demokratiko.

Impalgak ni Singson nga agkandidato ni Cong. Eric Owen Singson a party list representative ti Agrarian Development Association (ADA).

Itay nabiit, kimmappeng dagiti mamayor iti maikadua a distrito iti Liberal Party idinto a nabuangay ti koalision ti Bileg Party ken dadduma pay a partido a kas iti Nacionalista Partya partido ni Cong. Ryan Singson ken ti Nationalist People’s Coalition a partido ni Cabugao Mayor Edgardo S. Cobangbang, Jr.

Iti immun-una nga interbiona iti media, kinuna ti laklakay a Singson nga agtalinaed ti Bileg Party a binangonna agsipud ta daytoy ti accredited iti Comelec a partidona.

Kinuna pay ni Singson kameng met ti Liberal Party idi damona ti tumapog iti politika ket nagkaduada iti daydi nag-Senador Benigno Aquino, Jr. iti oposision maikontra iti grupo da nag-Presidente Ferdinand Marcos, Jr., nag-Presidente Fidel Ramos ken agdama a Sen. Juan Ponce Enrile.

Tumaray dagiti agkabsat a Singson iti babaen ti koalision a Nacionalista Party-Bileg Party.

Dati a nasinged a kaaliado ni Singson da Verzosa ken Rafanan ngem nagsisina ti dalanda gapu met laeng iti politika.

Ni Verzosa idi ti trouble shooter ti gobernador kadagiti problema dagiti taga-Ilocos Sur a mangmangged iti ballasiw-taaw nga adda pakainaigan iti trabahoda  iti ballasiw taaw. Maungpotnan ti tallo a terminona a mayor ti Tagudin.

Iti sabali a bangir, dati nga announcer  ni Rafanan iti DWRS, radio station a kukua da Singson, ket namin-adu a nangabak a bokal iti umuna a distrito ngem nagsinada iti gobernador idi mapapati a saan a pinatgan ni Singson ti kalikagumna nga agtaray a para gobernador agsipud ta ni Savellano ti napilina nga agkandidato iti dayta a puesto.

Sumagmamanon a daras a nagsango da Savellano ken Rafanan iti kinagobernador ngem inatiw ti abalayan ni Singson.#