BANNER NEWS: Gun for hire nangpapatay iti Napo barangay captain

STO. DOMINGO, Ilocos Sur – Sabali pay a pammapatay ti insayangkat dagiti armado a tattao a riding in tandem idi pasado alas 6 ti bigat ti Nobiembre 5, a nakagudasan ti nangabak a barangay captain ti Barangay Napo ditoy nga ili.

Iti pannakiuman ti media ken ni Police Chief Inspector Honesto Lazo, hepe ti polis ditoy, kinunana a sinurot dagiti suspek ni Barangay Captain elect Benito Tolentino, Jr., naasawaan, residente iti Barangay Napo, bayat ti panagdaliasatna iti national highway, kaduana ti asawana ken ti anakna ket pinaltoganda ti biktima iti awan matatao a lugar iti amianan ti TAD Marketing a sakup ti Barangay Baconero ditoy met laeng nga ili.

Nagsagrap ti biktima iti sugat iti ulo a gapuanan ti cal. 45 a dagus a nakatayanna.

Naammuan a saan a naan-ano ti asawana ken ti anakna malaksid ti kammuol iti muging ti ubing ken garumiad iti rupa ti ina gapu iti pannakatumba ti luganda kalpasan ti pammaltog.

(Addan suspek ti polis iti pannakapapatay ni Barangay Captain elect Benito Tolentino, Jr., daytoy ti kaudian a report manipud iti provincial police office.

Nailasin ni Joy Riego, asawa ti biktima, ni Jesli Tugadi a maysa kadagiti nagkalubbon iti motorsiklo a nangisayangkat iti pannakapapatay ni Tolentino.

Kanaig daytoy, naipilan ti kaso a murder maikontra ken ni Tugadi ken ti di pay nainaganan a kaduana.

Ni pay Tugadi ti kangrunaan a suspek iti pannakapapatay ti maysa a Singaporean national iti uneg ti maysa a hardware store iti Vigan City. -Ed)

Nangisayangkat iti pursuit operation dagiti polis iti panangidaulo ni Lazo kadagiti kriminal ngem negatibo ti resultana.

Maysa a saksi ti nagkuna a nagpaabagatan dagiti suspek sada nagbaw-ing a nagpaamianan.

Di pay ammo no ania ti motibo ti pammapatay.  Ngem segun iti polis, natalna met ti eleksion a naisayangkat iti Barangay Napo ken nagkinnappia metten ti biktima ken ni Arnel Tubon a kinasangona iti kinakapitan ken ti last termer a barangay captain.

Kabayatanna, napilaan iti kaso a frustrated homicide ni Dennis Abrigonda y Navarro, 28, residente iti Barangay Sagsagat, San Ildefonso, Ilocos Sur gapu iti pananggandatna iti biag ni Loreto Ascanio Tabin, 40, naasawaan, residente met laengiti Barangay Sagsagat, San Ildefonso, Ilocos Sur idi rabii ti Oktubre 29.

Maipalagip a sakbay ti pammaltog, naginom ti suspek ken sumagmamano a kaduana iti balay ni Edwin Penol ket nagawid daytoy a naglugan iti traysikelna. Kalpasanna, nagsubli ti suspek ket nagsardeng iti sango ti balay ni Freddie Tabin, kabsat ni Loreto, a paggiinoman met ti biktima.

Mapapati a binunot ni Navarro ti paltogna ket pinaputokanna ti grupo a nakapuntaan ti kanawan a gurong ni Loreto.

Gauge 12 shotgun ti naaramat iti pammaltog kas maibatay iti 4 a pellet a narekobre dagiti nagresponde a polis iti crime scene.

Idi agsapa ti Oktubre 31, napapatay met ni Casimiro Raqueno, Jr. y Rea, 52, naasawaan, mannalon, residente iti Barangay Daya, Vigan City iti uneg ti resthouse iti fishpondna iti Barangay Cabaroan, Sta. Catalina.

Nagsagrap ti biktima iti sugat iti kanawan nga imana, makannigid a paset ti tengngedna ken makannawan a kilikilina a nagtaud iti cal. 45 kas maibasar iti maysa a kapsula ken maysa a deformed slug.

Idi parbangon ti Oktubre 29, napaltogan met ni Edmar Arquelada y Balallo, 22, baro, residente iti Barangay Bulala, Vigan City.

Nabigbig ti suspek a ni Gomercindo Aquino y Aragoza, 55, naasawaan.

Iti inbestigasion, naammuan a matmaturog ni Arquelada iti kalapawna idi simrek ti suspek ket pinaltoganna ti biktima.#