BANNER NEWS: Ibutos ti Vigan City iti New7Wonders Cities of the World: CHED, PCOO

VIGAN CITY – Ad-adda pay a pimmigsa ti kampania ti Vigan City a mairaman a maysa iti New7Wonders Cities of the World kalpasan a nainayon ti Commission on Higher Education kadagiti nangipasingked iti suportana iti siudad.

Maysa a memorandum ti impatulod ni CHED chair Patricia Licuanan kadagiti amin a direktor, dadaulo dagiti publiko ken pribado a pagadalan ti sekundaria tapno suportaranda daytoy a kampania ti Vigan City.

Nailanad pay iti memorandum iti nalawlawa a pannakaiwaragawag daytoy a panangsuporta ti CHED iti Vigan City iti kampaniana a mairaman a maysa iti New7Wonders Cities.

Kanaig daytoy, imbilinen ni Presidente Benigno Aquino III ken ni Secretary Sonny Coloma ti pannakasuporta ti kampania ti Vigan City babaen ti panangipaay dagiti nasional nga opisina iti babaen ti Presidential Communications Operations Office (PCOO) dagiti suporta ti komunikasion kas iti pannakaaramat dagiti network ti print, broadcast ken telebision a pakairamanan metten ti social media.

Kabayatanna, inyussuat dagiti agtuturay ditoy siudad nga indauluan ni Mayor Eva Marie S. Medina ti napingpinget pay a kampania kadagiti tartaraudin a paset ti panagbubutos para iti New7Wonders Cities of the World babaen ti panangidagadagna kadagiti amin a Filipino ti panangibutosda iti Vigan City, saan laengen a babaen iti internet no di pay babaen iti text messages.

Indarirag ni Medina ti panagbutos kadagiti amin a Filipino iti panangitextda iti butosda iti Vigan babaen iti 29290777 tapno mairaman a maysa iti New7Wonders Cities of the World.

“Mangnamnamakami iti puersa ti Pilipinas kas texting capital iti sangalubongan a mangitag-ay iti pannakaibutos ti Vigan City a maysa iti New7Wonders Cities of the World,” kinuna ni Medina.

Pinagyamanan pay ni Medina da Vice President Jejomar Binay ken Senator Loren Legarda gapu iti panangitedda iti suportada iti daytoy a kampania ti Vigan City a mabutosan a maysa iti New7Wonders Cities.

Itay nabiit, inawagan mismo ni Vice Pres. Jejomar Binay ken ni Sen. Loren Legarda dagiti Filipino taono ibutosda ti Vigan City  a maysa iti New7Wonders Cities of the World.

Kinuna ni Binay nga isarming ti Vigan ti nabaknang a kultura ken historia ti pagilian ket kas “Filipino a sipapannakkel iti bukodna a tawid, tumulongtayo a mamagbalin ti Vigan a bukodtayo a pagsidsiddaawan ti lubong”.

Kinuna ni Binay a no magun-od ti Vigan ti titulo, maawisna dagiti lokal ken ganggannaet a bisita nga agpasiar iti siudad ken mangipaay iti inspirasion a mangdayaw iti tawid ti pagilian.

“Gundawaytayo daytoyen a mangipabuya iti kinapintas  ti pagilian, ken guyugoyen dagiti dadduma a mangsalaknib ken mangpreserba iti kultural a tawidda tapno adda dayawen ken ipatpateg iti masakbayan a henerasion,” kinuna ni Binay.

Kinuna met ni Legarda a rumbeng laeng a mairaman ti Vigan City iti New7Wonders Cities saan laeng a tapno iyegna ti dayaw iti pagilian no di pay mangipaay iti nasayaat nga ehemplo kadagiti sabali pay a siudad no kasanoi a ti historia ken kultura ket makatakder iti let-ang ti modernidad.

“Isubli dagiti naannad ti pannakapreserbada nga agtawen iti sangagasut nga istruktura iti napnuan pakasaritaan a Siudad ti Vigan dagiti tattao iti napalabas, ngem ti ipalpalnaad ti kinaprogreso ti siudad a nasayaat ti panagtrabaho ken panangaramat dagiti umili ken ti gobierno iti daytoy a UNESCO World Heritage Site iti autonomiana,” kinuna ni Legarda.

“Rumbeng a tuladen ken bigbigen dagiti best practices nga impakat dagiti tattao ti Vigan tapno mapreserbada ken maipromotda ti kultura bayat ti panagtrabahoda para iti agtultuloy a panagdur-as. Awagak dagiti Filipino tapno suportaranda daytoy a tignay ti Vigan City nga agbalin a maysa iti New7Wonders Cities,” indarirag ni Legarda.

Nangrugi ti kampania para iti New7Wonders Cities of the World idi 2012 a nakairamanan dagiti nasurok a 1,200 a nominado a naggapu iti agarup 220 a siudad.

Nairaman ti Vigan City iti top 77 a siudad iti qualificatioin phase. Napabassit ti bilang dagiti cities-finalists iti 28 idi Oktubre 2013.

Dakkel ti namnama da Mayor Medina a mairaman ti Vigan City kadagiti 21 a finalist a siudad para iti New7Wonders Cities of the World a maiwaragawagto inton Hulio 7.

Mapabassitto pay ti bilang dagiti siudad iti 14 finalists inton Oktubre 7, santo iti pinal a 7 a siudad inton Disiembre 7. (Tawid News Team)