BANNER NEWS: Imahe ti Sugpon a pakatartaraknan ti marihuana, naidagadag a mabura

VIGAN CITY – Indagadag ti bise gobernador ditoy ti panangiwayat dagiti kapolisan iti rehion tapno mabura ti imahe ti ili a Sugpon nga iti sakupna ti pakaimulmulaan dagiti mararaut a plantasion ti marihuana.

Kinuna ni Vice Gov. Deogracias Victor Savellano bayat ti Regional Peace and Order Council meeting a naangay itay nabiit iti Baluarte, ditoy siudad a masansan a maikalam-it ti probinsia ti Ilocos Sur, nangruna ti ili a Sugpon a pakaimulmulaan dagiti marihuana a maiwaragawag kadagiti warnakan ken broadcast radio a mangdadael iti imahe daytoy upland municipality a sakup ti probinsia ti Ilocos Sur.

“Tunggal regional peace and order council meeting, iririingtayo latta daytoy…” kinuna ni Savellano idinto nga innayonna a makapadakes ti imahe a parnuayen dagiti damag iti probinsia, nangruna iti ili a Sugpon

Iti kallabes, no adda dagiti maisayangkat a panagraut kadagiti plantasion ti marihuana iti tri-boundary ti Ilocos Sur, La Union, ken Benguet, ti  ili a Sugpon ti masansan a mairakurak a nakapag-utan ken nakauraman dagitoy maiparparit a mula.

Inlawlawag ni Savellano a no mapan dagiti operatiba a kameng dagiti nadumaduma a bunggoy ti polis agraut kadagiti plantasion iti nadakamat a tri-boundary, iti Sugpon ti pagnaan dagitoy.

Innayonna nga apaman a maisayangkat ti raiding team ti operasionda, iti man met laengen Sugpon ti sumaloganda ket no pinidut ti media, agparparang metten nga iti Sugpon ti nakaalaan dagiti naparut a mula ti marihuana, banag nga indagadagda a makorehir tapno mabura ti mansa a daytoy nga ili ti pakatartaraknan dagiti napag-ut a mula a marihuana.

Iti kallabes, masansan a linagidaw ni Mayor Fernando Quiton ti pannakaiwarwaragawag kadagiti warnakan ken radio dagiti damag nga iti ilina ti pakatartaraknan dagiti mula a marihuana iti baet nga ad-adda a sakup ti Benguet dagiti nararaut a plantasion ti marihuana.

Iti maysa nga interbiona iti media iti napalabas, kinuna pay ti mayor a gapu kadagiti naipadpadamag kadagiti warnakan, nabirngasan pay ketdin ti ilina a “marihuana country” idinto nga inyunay-unayna a rumbeng a makorehir daytoy makapadakes nga imahe ti ilina.

Kabayatanna, kinuna ni Savellano a kasapulanen a maitudo no ania ti akinsakup kadagiti plantasion a pakaimulmulaan dagiti marihuana tapno malawlawagan ti isyo ken makorehir ti dakes nga imahe a maikabkabit iti ili a Sugpon.

Kasta met nga indagadag ni Savellano ti panagmula iti alternative crop kas iti ube kas kasukat iti mula a marihuana tapno adda latta pamastrekan dagiti lumugar.

Nupay kasta, ti pannakaibiahe dagiti produkto manipud kadagitoy ginget a lugar ti makita a problema.

“… Masapul a maadal daytoy,” kinuna ni Savellano bayat ti interbio kenkuana ti media itay nabiit.#