Footer

BANNER NEWS: Insidente ti panagpipinnaltog security dagiti kandidato, mapalutpot

SAN FERNANDO CITY – Nangbuangay ti police regional office ditoy iti maysa nga espesial a task force nga agpalutpot mainaig iti insidente ti pammaltog iti Barangay San Julian West, Agoo, La Union idi Abril 2.

Segun iti report a dimmanon ditoy, mapapati nga inalikubkob dagiti supporters ni Dr. Eufranio Eriguel, kandidato para kinadiputado iti maikadua a distrito ti La Union, ti compound ti pagtaengan ni Ma. Theresa Dumpit-Michellena iti agarup 2:45 ti malem ti Abril 2 ket napasamak ti panagbibinnugkaw dagiti dua a kampo a sinaruno dagiti putok  a mapapati a naggapu iti agsumbangir a nagpaut iti sumagmamano a minutos.

Mapapati a sa la nagsardeng dagiti putok idi simmangpet dagiti nagresponde a polis manipud iti Agoo police station.

Kanaig daytoy, imbilin ni Police Chief Supt. Constante Azares, Jr., regional director, ti pannakarelibo ti hepe ti polis ti Agoo ket dinesignaranna ni Police Chief Inspector Joel Quintero kas sukatna nangrugi itay April 3.

Imbilin pay ti regional director ti pannakaideploy ti maysa a team ti 1st Regional Public Safety Management Battalion nga agisayangkat iti naing-inget a checkpoint ken panagpatrolia iti nasao a lugar.

Sakbayna, nagpaayab ni Azares iti case conference a nangbuangayanna iti Special Investigation Task Group (SITG) San Julian idinto a pinagkutina ti STG Eriguel nga idauluan ni Police Senior Inspector Joshua Maximo a mangisayangkat iti police operations maikontra kadagiti puntiria a personalidad.

Personal nga indauluan a ni Azares dagiti key officers a nag-inspect iti nakapasamakan ti krimen.

Innem a polis a mapapati a karaman iti shooting incident ti na-pull out a security detail da Dumpit-Michellena, congressional candidate Eufranio Eriguel ken ti asawana a ni Sandra Eriguel ken naipanda iti restrictive custody iti headquarters.

Naibilin pay ti panangisuko dagiti polis iti paltog a naiyisio kadakuada ken pannakaamirisda iti paraffin test iti Regional Crime Laboratory Office tapno maammuan no nagpaputokda.

Kinuna ni Azares a gapu iti pannaka-pull out dagiti innem a polis, mangipaayda iti seguridad iti residensia ni Dumpit-Michellena.

Madama ti panagala ti SITG San Julian kadagiti testimonia dagiti saksi ken dadduma pay nga ebidensia a mangsuporta iti pannakaipila dagiti maiyannatup a kaso mainaig iti pammaltog.#