BANNER NEWS: Kabarbaro a legislative building, naisibbo

VIGAN CITY – Naisibbo ti baro a pasdek lehislatura ditoy siudad idi umuna nga aldaw a panagsession dagiti katugtugaw a kameng ti sangguniang panlungsod ditoy itay lawasna.

Mismo a ni Goberandor Ryan Singson, kaduana dagiti sumagmamano a kameng ti sangguniang panlalawigan a pakaibilangan da Bokal Edgar Yabes ken Bokal Constante Oandasan, ti nagbalin a kangrunaan a sangaili iti pannakaisibbo ti nasao a pasdek a nainaw idi bise mayor pay ti gobernador.

Naipatakder ti legislative building babaen ti panagbinnulig ti city government nga idadauluan ni Mayor Eva Marie S. Medina ken ni Singson bayat ti panagtakem daytoy a mangibagi iti umuna a distrito ti Ilocos Sur.

Kinuna ni Medina nga iti pannakaipatakder ti baro a legislative building, namnamaenna nga ad-adda pay a gumaed dagiti konsehal iti panagputarda kadagiti nasaysayaat nga ordinansa.

“Ita ta addan kabarbaro nga opisinada, manamnama nga ad-adda pay a mainspirarda nga agputar kadagiti dekalidad a legislation, kasta met a nadaras nga iyimplementar…” kinuna ni Medina.

Innayon ni Medina nga uray kasano kasayaat ti ordinansa wenno gakat no narigat nga iyimplementar iti executive level, agbalinda laeng nga inutil.

“Ita ta adda bukodda nga opisina, sapay koma ta napingpinget pay ti pannakikamayyetda kadagiti nadumaduma a departamento ti gobierno ti siudad,” inyunay-unay ni Medina idinto nga inannugotna nga iti kallabes adda naparnuay nga irritations iti nagbaetan ti sangguniang panlungsod ken dagiti nadumaduma a departamento.

“Namnamaek nga iti kaadddan iti opisinada, masansandanton a mapan iti opisinada ket no adda kasapulanda…, sapay koma ta mapanda kadagiti nadumaduma a departamento,” kinuna ti mayora.

Segun ken ni Medina,  nagbuligan ti city government ken ti opisina ni Congressman (idi) Ryan Singson nga imbaklay ti pondo para iti pannakaipatakder iti nasao a pasdek lehislatura a napunduan iti agdagup P9 million.

Nangilatang ni Singson iti P4 million idinto nga imbaklay ti city government ti P5 million iti pannakabangon ti baro a legislative building a nainaw idi bise mayor pay ni Singson iti Vigan.

Kabayatanna, kinuna ni Singson a maragsakan ta natungpalen ti arapaapda idi bise mayor pay laeng a pannakabangon ti baro a legislative building para iti sangguniang panlungsod ti Vigan.

Innayonna a pammaneknek daytoy a no adda “partnership… nadaras a maaramid ti trabaho”.#