Footer

BANNER NEWS: Kakandidato, nagpirma iti peace covenant iti Simbaan ni San Pablo

VIGAN CITY – Nagpirma itay Pebrero 6 dagiti kandidato iti nadumaduma a lokal a posision iti maysa a katulagan ti kappia tapno maipasiguro ti natalna ken nadalus nga eleksion inton Mayo 13, 2013.

Nagpirma  iti peace covenant iti mismo a laem ti nadaeg a St. Paul Metropolitan Cathedral ditoy siudad dagiti kandidato a pakaibilangan da Congressman Ryan Singson, Vice Gov. Deogracias Victor Savellano, dati a Congressman Ronald Singson, Atty. Beltrand Baterina, Tagudin Mayor Roque Verzosa, Jr., dati a Bokal Efren Rafanan, Sr., 12 kandidato para sangguniang panlalawigan, 36 a para mayor, ken 36 a para bise mayor kas pammatalgedda iti tarigagayda a nadalus ken natalna ti maiwayat nga eleksion.

Saksi iti panagpirma iti peace covenant dagiti opisial ti kapolisan nga indauluan ni Regional Director Police Chief Supt. Ricardo C. Marquez, dagiti dadaulo ti Simbaan nga impanguluan ni Auxillary Bishop ti Nueva Segovia a ni Most Rev. William David Antonio, dagiti opisial ti Philippine Army, nga imbagian ni 81st IB Commanding Officer Lt. Col. Desiderio Alaba, pannakabagi ti Commission on Elections, PPRCV, ken dagiti kameng ti media.

Inimatangan met da Nueva Segovia Archbishop Ernesto Salgado ken Gov. Luis “Chavit” Singson iti nadakamat a panagpirma dagiti kandidato iti katulagan ti kappia.

Iti panagpirmada iti peace covenant, inkari dagiti kandidato a saanda nga agaramid iti maisupring iti linaon ti pinirmaanda a katulagan ken aramidenda ti kabaelanda a mangtengngel kadagiti pasurot ken liderda tapno maliklikan ti inningar iti nagbabaetanda.

Naipalaon pay iti peace covenant ti panagkari dagiti kandidato a liklikanda ti panangatakarda iti personal a biag ken pamilia dagiti kabalubalda; ti mangisayangkat iti aniaman a biolente nga aramid ken panangbuangay iti armado a grupo bayat ti tiempo ti eleksion;  ti panaggatang iti butos, panagkusit ken panagipangta; ti aggastos iti dakdakkel ngem iti ituyang ti linteg ken ti panangakseptarda iti agbalin a resulta ti eleksion.

Inyunay-unay ni Most Rev. Antonio a “ti koma kappia a maiyataday iti kayat ti Dios ti ipakattayo a saan ketdi a parparawpaw laeng” sana impalagid nga “uray no agiinnisem ken aglilinnamanokayo,  no saankayo met la nga agsasarita, wenno uray awan ti agar-aramid iti kinadamsak ngem awan met ti sinninged iti nagbabaetanyo, saan a naan-anay a kappia dayta.”

Innayonna nga awan ti maited a nasayaat ti kinadamsak ta malaksid a panangsupring dayta iti pagayatan ti Dios, saan pay a maikkan iti solusion ti parikut.

Dinawat met ni Supt. Marquez kadagiti amin a kandidato ti panagbalinda a napudno iti balikasda ken dida koma paayen ti ekspektasion dagiti botante idinto a nagyaman iti sektor ti relihion ken dadduma pay nga stakeholders gapu iti pannakipasetda iti nasao a pagteng.

“Iti panagtitipontayo, a maymaysa ti panggeptayo a natalna nga eleksion, saantayo a mapaay,” kinuna ti regional director. (Karaman ti report ni Mancielito S. Tacadena)