BANNER NEWS: Kapolisan, nagsasaruno insayangkatda a buy-bust, search operations

SANTA, Ilocos Sur – Kas panangipakitana iti naing-inget a panangipakatna iti kampania kontra illegal a droga, nagsasaruno dagiti buy bust ken search operations nga insayangkat ti kapolisan iti maudi a lawas ti Abril.

Kanaig daytoy, balligi ti insayangkat dagiti nagtitipon nga elemento ti kapolisan a panagsukisok iti balay ti maysa a masuspetsa a drug pusher sadiay Barangay Mabilbila Sur, ditoy nga ili idi malem ti Abril 28.

Iti panagsukisok ti nagtipon a grupo ti kapolisan a pakaibilangan ti Provincial Anti-Illegal Drug Operation Task Group (PAIDSOTG) ISPPO, Ilocos Sur Provincial Public Safety Company (ISPPSC) ken Santa police station iti balay ni Ronald Molina y Acosta, 36, naasawaan, ken residente iti nadakamat a barangay, nakakumpiskada iti dua a heat sealed plastic sachet a naglaon iti mapapati a shabu, 2 improvised lighter, maysa a crumpled aluminum foil, 4 nga improvised tooter nga aluminum foil, 4 a bala para iti cal. 45 ken 7 a bala para cal. 22.

Napilaan ni Molina iti panaglabsingna iti Section 11 ken 12 ti RA 9165 ket nairekomenda ti panagpiansana iti P200,000.00 ken P60,000.00.

Agsipud ta saan a nakapagpiansa para iti temporario a wayawayana, naipatulod ti suspek iti provincial jail, Vigan, City babaen ti commitment order nga inyisio ni Judge Sixto Diompoc ti Regional Trial Court, Narvacan, Ilocos Sur a napetsaan iti Abril 30.

Immun-una ngem daytoy, idi agarup 11:30 ti Abril 25, natnag iti ima dagiti elemento ti PDEA ISSET ken Sta. Maria police station ti maysa a miembro ti Cabuena drug group babaen ti insayangkatda a buy-bust operation.

Nakakumpiska dagiti polis ken ni Danilo Anastacio Cabreros, 53, naasawaan, ken residente iti Barangay Poblacion Norte, iti maysa a transparent heat sealed plastic sachet a nagkarga iti mapapati a shabu, cigarette foil a pagbungon iti masuspetsa a shabu, uppat nga empty plastic sachet, ken 2 a sag-P1,000.00 a naaramat a marked money.

Addan iti kustodia ti PDEA dagiti nakumpiska para iti dokumentasion ken umisu a disposision.

Idi met agarup alas 10:00 ti bigat daytoy nga aldaw, tallo a lallaki ti inaresto dagiti polis-Vigan bayat ti mapapati a pot session iti uneg ti maysa a kalapaw sadiay Barangay III.

Nabigbig dagiti suspek a da Angelito Pascua Paz, 38, baro, ken residente iti Zone 4, Bantay, Ilocos Sur; Albert Mendoza y Arellano, 33, naasawaan, ken residente iti Barangay III, Vigan City; ken Marlon Pantaleon y Alcain, 38, naasawaan, ken residente iti Barangay Rugsuanan, Vigan City.

Nakakumpiska dagiti nagtitipon a kameng ti Intel, Investigation, ken patrol ti Vigan City police station, PDEA ISSET 1 ken PAIDSOtG iti babaen ti superbision ni Vigan OIC, Supt. Maximo Taclas iti dua a pedaso ti plastic sachet a naglaon iti mapapati a shabu residue, 2 aluminum foil, 2 lighter, ken 2 a nakupkupil nga aluminum foil.

Naipatulod dagitoy iti crime laboratory office para iti pannakaamirisda.
Sinaksian dagiti barangay officials ken mediamen daytoy nga operasion ti kapolisan.

Kabayatanna, sabali met a buy-bust operation ti insayangkat dagiti polis-Candon nga indauluan ni Inspector Ernesto de Bien, Jr. ken ti Sta. Cruz police station iti babaen ti koordinasion ti PDEA ISSET a nagresulta iti pannakaaresto ni Fredelson Alipda y Quian, 46, naasawaan, ken residente iti Barangay Bugnay, Candon City.

Naala iti ikut ni Alipda ti maysa a heat sealed plastic sachet a mapapati a naglaon iti shabu, maysa a P500.00 a naaramat a marked money, ken Nokia cellphone.

Naipan iti police station ti suspek ken dagiti nakumpiska kenkuana para iti maikanatad a disposision.#