BANNER NEWS: Karit ni Baterina a panagpaeksamenda iti droga, inawat ni Singson

VIGAN CITY – Inawat ni dati a Congressman Ronald Singson ti karit ni Atty. Bertrand Baterina nga agpaeksamenda iti droga tapno matulnekanen ti alegasion ti kampo ti kasupangetna a kandidato  nga agar-aramat iti droga.

Iti panangakseptar ni Singson iti karit ni Baterina, kinunana nga “uray isbo, buok ken uray aniaman”, sisasagana a mangipa-drug test.

Kanaig daytoy, kinarit ni Singson ni Baterina nga ag-joggingda iti lima a kilometro tapno makita dagiti botante no physically fit a tumaray a kas lider iti umuna a distrito ti probinsia.

Kinuna ni Singson nga idi panagkitada ken ni Baterina idi agpirmada iti peace covenant nga inwayat ti Simbaan ken kapolisan, adu ti kimmuttongan daytoy ket adda dagiti damag a maigapu daytoy iti pannakaiwayat kenkuana ti multiple by-pass operation.

“Awatek ti karitna nga agpa-drug testkami, ngem karitek met nga ag-joggingkami iti lima a kilometro sakamto mapan agkampania,” kinuna ni Singson.

Immuna ngem daytoy, nangipila ni Baterina iti Commission on Elections iti mosion a mangdiskualipa ken ni Singson agsipud iti pannakakonbiktarna iti panagikut iti droga iti maysa a korte sadiay Hong Kong.

Segun iti mosion, sagudayen ti Section 12 ti Omnibus Election Code a makapagkandidato laeng ti maysa a nakonbiktar iti aniaman a posision kalpasan ti lima a tawen manipud iti pannakakonbiktarna.

Ngem insungbat ni Singson a saan a sakup ti hurisdiksion ti Hong Kong court ti linteg ti pagilian.

Innayon ni Singson a sakbay a nagipila iti sertipiko ti kandidatura, naikonsultan dayta kadagiti abogadona ket inggarantia dagitoy a balido ti kandidaturana.

Mainaig iti alegasion ni Baterina a pinasardeng ti konboy ni Singson ti luganda bayat ti panagkampaniana iti Bantay ken panaggaramat daytoy iti wangwang, inlawlawag ni Singson a konboy daytoy ni Bise Presidente Jeomar Binay idi bimmisita daytoy iti Ilocos Sur idi Abril 20.

Innayon ni Singson a dua a luganna ti impasublatna ken ni Binay iti panagpasiar daytoy iti probinsia ken awan ti naikabit a wangwang kadagitoy.

Kinuna ni Singson a saan nga agdur-as ti mosion ni Baterina a mangpadiskualipika kenkuana.

“… in the event a madiskualipika ako, ang tatay ko (Gov. Chavit Singson) ang makakalaban niya,” kinuna ti ub-ubing a Singson.

Kinuna ni Singson a “very malicious in timing, in depth and content” ti panagipila ni Baterina iti motion for disqualification maikontra kenkuana idinto nga innayonna nga apay a di bay-an daytoy dagiti umili nga agdesidir no asino ti pilienda a mangibagi iti umuna a distrito ti Ilocos Sur iti Kamara.#