Footer

BANNER NEWS: Kiddaw a pannakasukat dagiti COP, saan a supiaten ni Chavit

VIGAN CITY – Saan a supiaten ti kampo ni Vice Mayor Ryan Luis Singson ti mapapati a kiddaw ni congressional candidate Atty. Trandy Baterina a masuktan dagiti sumagmamano a hepe ti polis iti umuna a distrito ti probinsia.

Kinuna ni Gov. Luis “Chavit” Singson nga uray inaldaw a masuktan dagiti hepe ti polis iti umuna a distrito, awan ti ikokontrana agsipud ta mangabakto met la ti anakna a ni Ryan Singson.

“Uray inaldaw a pasuktanda dagiti chief of polis… ken uray amin a polis, saantayo a komuntra ta didanto ibaga nga adda linolokona ti eleksion,” kinuna ti gobernador.

Dinakamat pay ni Singson nga idi tiempo ni Pres. Ramos, uppat a ribu a soldado ti naibaon iti probinsia a mangkita iti eleksion ngem nangabak met latta.

Kinuna ni Singson nga “arte iti eleksion” ti panangpasukatda kadagiti COP idinto nga impaganetgetna a dina kontraen uray kiddawen ti kampo ni Baterina a mapasukatan amin a hepe ti polis ken uray amin a polis iti probinsia agsipud ta isunto met laeng ti resulta ti eleksion a mangabak ti anakna.

Iti yaasideg ti eleksion, rimmuar ti alegasion nga agiwarwaras ti kampo ni Singson kadagiti kuarta a mapapati a paggatang iti butos ngem naglibakan ti bise mayor daytoy idinto a kinunana a mangabak iti panagbubutos agsipud ta suportaran dagiti sangapulo ket maysa a mayor iti umuna a distrito ti Ilocos Sur.

Nababalaw met ni Baterina gapu iti mapapati a panagaramatna iti logo ti Liberal Party ken ladawan ni Pres. Benigno Aquino III iti baet nga awan ti nailanad a partido a nanginominar kenkuana iti certificate of candidacy (COC) nga impilana iti Commission on Elections.

Maisayangkat ti special elections iti umuna a distrito ti probinsia inton Mayo 28 a pakapilian ti diputado a sumukat iti binakantean a puesto ni dati a Cong. Ronald Singson kalpasan a sinentensiaan ti Hong Kong court a mabalud iti makatawen ket kagudua gapu iti panagikutna iti maiparparit a droga.#