BANNER NEWS: Konsultasion para pannakarepaso IRR tI Sin Tax Law, inangay ti NTA

RINUGIANEN ti National Tobacco Administration (NTA) ti konsultasion kadagiti mannalon ti tabako mainaig iti pannakarepaso ti implementing rules and regulations (IRR) ti Sin Tax Law, partikular ti pannakaaramat iti masingir a buis manipud iti sigarilio.

Segun ken ni NTA Administrator Edgardo Zaragoza, pagtitinnulongan ti ahensia nga idauluanna, ti Department of Finance ken ti Department of Budget and Management a mangbukel kadagiti pagalagadan a mangipasigurado a  direkta a maipaay ti bingay ti industria iti excise tax ti tabako iti pagimbagan dagiti mannalon ken agserbi a nasayaat kadagiti ili a mabenepisiaran daytoy a pondo.

Iti konsultation a naangay idi Pebrero 8 iti Bauang, La Union, impanamnama ni Zaragoza kadagiti opisial ken kameng ti National Federation of Tobacco Farmers’ Associations and Cooperatives a maurnong amin dagiti singasing nga indanon dagiti mannalon kenkuana ket dagitoyto ti pagibasaranda kadagiti proyekto a maipakat. Farm-to-market roads, irigasion, subsidy iti produksion ken livelihood program dagiti sumagmamano a naisingasing iti konsultasion.

Maipalagip a dimmakkel ti excise tax iti tabako kalpasan ti implementasion  ti Republic Act (RA) No. 10351, wenno ti napabaro a Sin Tax Law idi Enero 2012.

Segun iti linteg, adda madadaan nga alokasion para kadagiti proyekto a mangpasayaat iti kasasaad dagiti mannalon ken mangmangged iti industria ti tabako, sabali pay ti livelihood program nga ipekpeksa dagiti immun-una a linteg a kas ti RA 8240 a nangilawlawag ti istruktura dagiti masingir a buis ti tabako ken ti RA 7171 a mangibilbilin ti pannakaibunong ti 15% nga excise tax iti sigarilio kadagiti probinsia nga agmulmula iti Birhinia a tabako.

Segun ken ni Zaragoza, marikna laeng ti parabur ti napadakkel a nasingir a buis idi 2013 kalpasan ti dua a tawen wenno inton 2015. Innayonna nga aramiden amin ti gobierno ti kabaelanna a mangtaming a nasayaat ti panagbibingay dagiti probinsia, distrito ken ili iti masingir nga excise tax kas sagudayen ti linteg.

Kanaig daytoy, naangay idi Pebrero 11 ti konsultasion kadagiti kompania nga aggatgatang kadagiti bulong ti tabako ken agar-aramid iti sigarilio, kas mangibagi met ti pribado a sektor.  Idi Pebrero 20 ken 21, nakidialogo ti ahensia kadagiti opisial ti lokal a gobierno kadagiti probinsia ken ili nga agmulmula iti tabako. (Neyo Valdez)