BANNER NEWS: Kumperensia iti lengguahe, literatura ti Ilokano, maangay iti Vigan City

VIGAN CITY – Angayen ti Komisyon ng Wikang Filipino (KWF) ti maysa a nailian a kumperensia mainaig iti lengguahe ken literatura dagiti Ilokano sadiay University of Northern Philippines ditoy a siudad inton Abril 25-27, 2014.

Katinnulong ti KWF ti National Commission for Culture and the Arts (NCCA), Gunglo dagiti Mannurat nga Ilokano iti Filipinas (GUMIL-Filipinas), Unyon ng mga Manunulat sa Pilipinas (UMPIL), University of Northern Philippines (UNP), ken Department of Education (DepEd) iti daytoy a nailian a kumperensia para iti pannakapatan-ay ti lengguahe ken literatura dagiti Ilokano.

Kangrunaan a panggep ti nasao a kumperensia a napauluan iti Kur-it ken Kurditan ti panagtitipon dagiti eksperto iti Kailokuan ken manamnama a tabunuan dagiti mangisursuro iti elementaria ken sekundaria tapno maitampok ti lengguahe ken literatura ti Ilokano ken matratar dagiti isyo ken panagbalbaliw kas napateg a pagsanggiran iti ad-adda pay a pannakaidur-as ti lengguahe ken literatura a Filipino.

Matratar bayat ti uppat a session ti kumperensia ti ortograpia nga Ilokano ken nailian nga ortograpia, panangaramid kadagiti learning materials para iti mother tongue based-multilingual education (MTB-MLE), panangidur-as iti literatura nga Ilokano, ken iti panagkanaig ti literatura nga Ilokano ken ti literatura ti pagilian. Adda naituding nga aglektiur ken panelista a mangted iti reaksion tunggal session.

Naammuan ken ni Ariel S. Tabag, direktor ti Gumil-Filipinas, a maipabuyanto pay iti nasao a kumperensia dagiti dallot, nakaugalian a sala, samiweng, bukanegan ken maiyalnagto ti libro maipanggep iti biag ken sinurat ni Mena Pecson Crisologo, nalatak a mannaniw ken dramatista nga Ilokano idi kapanawenanna.

Da Dr. Virgilio Almario, national artist iti Literature ken chairman iti KWF, Vigan City Mayor Eva Marie S. Medina, Dr. UNP President Dr. Gilbert Arce dagiti mangipaay iti pangablaaw a mensahe idinto a da Gumil-Filipinas President Arthur P. Urata, Sr., ken UMPIL President Karina Bolasco dagiti mangited iti pangrikep a bitla iti nasao a kumperensia a manamnama a tabunuan pay dagiti mannurat nga agsursurat iti Iloko ken Filipino ken dagiti agiwarwarnak ken linguists.#