Footer

BANNER NEWS: Lalaki a suspetsa iti pannakapuor iti pagtagilakuan, makasuan

VIGAN CITY – Makasuan iti arson
resulting to homicide ti lalaki a masuspetsa a nangipuruak iti nakasindi a sigarilio iti paglakuan iti paputok a nakaigapuan ti
pannakapuor ti maysa a pasdek ken nakatayan ti akinkukua sumagmamano
a kanito apaglabes ti isasangbay ti baro a tawen.







Adda iti ikut ti polis ti suspetsa
a ni Richard Pugal, 21, baro, residente iti Capangpangan, ditoy a
siudad bayat a maisagsagana ti darum maikontra kenkuana.

  Ngem kinuna ni Pugal a saanna nga inggagara a napuruakan iti nakasindi a sigariliona dagiti paputok kalpasan a gimmatang iti rebentador iti nasao a pagtagilakuan.

Dimmapo ti tallo a kadsaaran a
pasdek a nakaibalayan ti FQ Store ket nairaman a linamut ti apuy ti
maysa a dyip a nakaparada iti asideg ti pagtagilakuan ken ti
akinkukua, ni Florencio Sy Que, 62, a mapapati a nakubong iti uneg ti
pasdek bayat ti uram.

Dua a babai ken maysa nga ubing a
nakubong iti pasdek ti naireport a naisalakan dagiti bombero.

Segun dagiti polis, iti baet ti
nadaras a panagresponde dagiti bombero ditoy ken dagiti kaparanget ti
siudad nga il-ili, nadaras ti pananglamut ti apuy iti pasdek gapu iti
panagbettak dagiti tagilako a paputok.

Iti inisial nga inbestigasion
dagiti polis ditoy, mapapati a pinuruakan ni Pugal iti sigarilio ti nakaikabilan dagiti paputok a nakaigapuan iti nadaras a panagkayamkam ti apuy a nanglamut iti sibubukel a pasdek.

Mapapati a binugbog dagiti tattao
ti suspetsa gapu iti insidente.

Sabali pay a lalaki ti nasuspetsa
a kadua ni Pugal iti mapasamak ti uram ngem nakumpirma a nairana
laeng a gumatgatang iti paputok idi mapasamak ti insidente.

Mapapati a nabartek ni Pugal idi pinuruakanna iti sigarilio dagiti paputok.

Kabayatanna, maysa a polis ti
posible a makasuan kalpasan a natakuatan a positibo a nagpaputok iti
paltog iti Barangay Cabasaan ditoy siudad.

Nainaganan ti polis a ni PO1 Joven
Pastores, residente iti San Vicente, Ilocos Sur ngem nakabase iti
Sigay, Ilocos Sur.

Segun iti report, napan binisita
ti polis ti mapapati a gayyemna a babai ngem naigalut gayamen daytoy
ket nagpaputok ti polis iti sakit ti nakemna.

Nakarekobre dagiti polis ditoy iti
sumagmamano a kalpsula a naggapu iti cal. 38 ken M-16 armalite rifle
iti lugar a mapapati a lugar a nagpaputokan ti suspetsa.

Segun ken ni Chief of Police
Maximo Taclas, naireportnan ti nasao nga insidente iti provincial
headquarters.

Adda pammilin manipud ken ni PNP
Chief, Director General Jesus AmeVerzosa a maiparit ti panagpaputok
dagiti polis kabayatan ti selebrasion ti Paskua ken Baro a Tawen.#