BANNER NEWS: Lider ti gun-for-hire, inaresto dagiti polis

SANTA, Ilocos Sur – Ad-adda a dimmagsen ti sangsanguen a kaso ti maysa a dadaulo ti gun for hire gang nga agop-opereyt ditoy probinsia kalpasan a nakakumpiska dagiti polis a mangaresto kenkuana iti granada, balbala ken mapapati nga illegal a droga iti pagtaenganna idi malem ti Mayo 22.

Idi agarup 1:30 ti malem ti Mayo 22, nagturong dagiti nagtitipon nga elemento ti Narvacan Municipal Police Station ken Santa Municipal Police nga indauluan da Chief Inspector Modesto F. Carrera ken Chief Inspector Rex Buyucan iti Barangay Labut Norte, Santa tapno arestarenda ni Rodrigo Abiang @ Lodring, 40, ken residente iti Barangay Sucoc, Narvacan, Ilocos Sur, mainaig iti sangsanguenna a kaso a frustrated murder iti babaen ti Criminal Case 3791-N nga addaan iti P200,000.00 a nairekomenda a bail bond.

Imet dagiti polis idi napan arestaren ni Abiang ti warrant of arrest nga inyisio ni Judge Sixto D. Diompoc ti RTC Branch 72, Narvacan, Ilocos Sur.

Bayat ti operasion, nasukalan iti ikut ti suspek ti maysa a MKIV hand grenade, 6 a live ammunition para iti Cal. 45 pistol ken 3 cubes a masuspetsa a hashish (marijuana extract).

Ni Abiang ti maitudtudo a lider ti Abiang Group, notorious gun for hire gang nga agop-operate iti Ilocos Sur.

Maitudtudo pay ti grupo a nainbolbar iti drug trafficking ken gun running activities iti las-ud ti Ilocos Regioin ken kadarrapat a probinsia ti Ilocos Norte ken La Union.

Naipan ti naaresto iti CIDG office para iti dokumentasion.#