BANNER NEWS: Mabuangay a Metro Vigan Coordinating Council, adda legal a pagbatayan: Vice Mayor

VIGAN CITY – Kinuna ni Vice Mayor Franz Ranches nga iti sanguanan dagiti limitasion dagiti ili ken daytoy a siudad,  masapul ti panagkaykaysada tapno napigpigsa ti bosesda ken natibtibker a makikumpetision iti  globalisasion.

Impakaammo ti bise mayor nga iti naangay a panagpapatang ti konseho ti Vigan nga indauluanna ken dagiti counterpartda,  approved in principle ti singasing a pannakabukel ti Metro Vigan Coordinating Council a buklen ti Vigan City, Caoayan, Bantay, San Vicente, Sta. Catalina, San Ildefonso ken Santa.

Kinuna ni Ranches a nairaman iti naisingasing a coordinating council ti San Ildefonso ken ti Santa gapu iti kaasidegda iti Vigan City idinto nga innayonna nga “adda historical links, adda tiempo idi a parteda iti Siudad Fernandina”.

Kinuna ni Ranches nga “umad-adu ti pakakumikomanda (il-ili) ket it’s high time nga adda maysa nga organisasion wenno maysa a council nga isu ti mangtaming iti basic needs iti amin a maseknan a local government ti Vigan City ken kaarrubana a local government”.

“Ditoy nga adda sharing of responsibilities and sharing of resources in so far as basic needs are concerned,” kinuna ni Ranches.

Kinuna ni Ranches nga adda pagsasao a “no man is an island”  sana innayon a “saan met a mabalin a bukod laeng ti Vigan ti panagdur-as no di kayatna met nga ibinglay kadagiti local government a nanglawlaw kenkuana”.

Dinakamat nga ehemplo ti bise mayor ti operational  a waste management ti Vigan a mabalin nga “adda koordinasion tapno maakomodar dagiti kaarrubana nga ili” ken ti pannakadaldalus ti karayan daytoy a siudad a “saan met a mabalin a ti Vigan side laeng ti madalusan, madalusan amin (saklaw ti Caoayan ken Sta. Catalina)”.

Impatalged ni Ranches kadagiti padana a bise mayor a saan a mapukaw ti identidad, integridad wenno independensia ti tunggal ili.

Mainaig iti gobierno probinsial, kinunana  nga addanto met laeng “kortesia nga aramidentayo, awan (met) ti mabaliwan a paglintegan, ken marespeto latta ti autoridad ti gobierno probinsial ken “awan ti malabsing iti hierarchy of command ti provincial government”.

Kalpasan daytoy a patangan dagiti bise mayor, konsultaento met ni Mayor Eva Marie S. Medina dagiti padana a mayor mainaig iti mabukel a Metro Vigan Coordinating Council.

Kinuna ni Ranches nga adda legal basis ti mabukel a coordinating council kas maibatay iti Article 10, Section 13 ti 1987 Constitution ken iti local government code idinto nga innayonna a mangnamnama nga akseptaren dagiti local government units ti singasing “with open mind and hearts”.#