Footer

BANNER NEWS: Mabukel a Metro Vigan Coordinating Council, awan ti nangatngato: Mayor Eva

VIGAN CITY – Impasingked ni Mayor Eva Marie S. Medina  a no mabukel ti Metro Vigan Coordinating Council, awanto ti opisial a nangatngato ngem asinoman nga agturay ti ili wenno siudad.

Imbatad daytoy ni Medina tapno mapukaw ti panagduadua dagiti padana a mayor mainaig iti pannakaimaton ti mabukbukel a konseho a buklen ti pito nga ili ken maysa a siudad.

Malaksid ti Vigan, naimbitaran ti Caoayan, Bantay, San Vicente, Sta. Catalina, Santa, San Ildefonso ken Sto. Domingo a makipagkameng iti Metro Vigan Coordinating Council.

“It is called a coordinating council, nobody is above anybody,” kinuna ni Medina idinto nga inyunay-unayna nga isu laeng ti nangirusat iti pannakabuangayna ket no mabukel, “awanto ti nangatngato ngem aniaman nga ili wenno siudad” ket “agpapatasda amin ken agbalinda amin a miembro”.

Kinuna pay ti mayora nga awan ti permanente a mangidaulo iti Metro Vigan Coordinating Council ket no daytoy ti mapagnunummuan iti strategic planning, isunto ti masurot.

Naammuan iti mayora nga “adu metten (chief executive) ti nangited iti resolution of acceptance, adu pay dagiti saan” ket sakbay iti panaggibus ti Hulio, agsurat wenno agtawagto kadagiti padana a mayor tapno mapatalgedanna no interesado dagitoy wenno saan a makikappeng iti coordinating council.

“… No saanda nga interesado wenno awan ti maawatmi a resolusionda within a certain period, then we can just go ahead with our strategic planning workshop tapno agandar metten,” kinuna ni Medina.

Mangnamnama ti mayora a makapagpipinnirmada a mamayor iti katulagan iti kaaldawan ti selebrasion ti maika-250 a tawen ti Diocese ti Nueva Segovia ken ti Siudad ti Vigan.

Impalgak ti mayora a napilina ti Setiembre 4-9 a pannakaselebrar iti daytoy a pagteng a pannakaiyalis ti Dioses ti Nueva Segovia manipud iti Lallo, Cagayan.

Kinuna ni Medina a mangnamnama a maangay ti strategic planning iti maudi a lawas ti Hulio wenno umuna a lawas ti Agosto tapno maibinsabinsa no ania dagiti areas of cooperation a maaramid iti nagbabaetan dagiti munmunisipio ken Siudad ti Vigan, kasta met no ania ti laonen ti memorandum of agreement nga “isu ti pagibasarantayo a pangidawat ken ni Cong. Ronald Singson iti panangidatagna iti Kongreso ti maysa a gakat a mamagbalin daytoy MVCC a maysa a linteg…”

Kinuna ni Medina a no addan linteg a mangbayabay kadakuada a makimiembro, maikkan ti MVCC iti legal a personalidad ken nalaklakanton iti implementasion dagiti aniaman a pagkakammayatenda nga aktibidad, proyekto ken programa.#