BANNER NEWS: Maigapu panagpuor NPA iti ekuipo ti panagminas iti Quirino: alert status ti kapolisan iti I. Sur, imbilin ti Regional Director

CAMP BGEN OSCAR M FLORENDO – Imbilin ni Police Chief Supt. Roman A. Felix ti pannakaibayog ti alert status iti kapolisan ti Ilocos Sur iti sanguanan ti mapapati a panangpuor dagiti armado a tattao iti maysa a makina a pagminas sadiay Sitio Sinagaban, Patungcaleo, Quirino, Ilocos Sur idi rabii ti Pebrero 18.

Kinuna ni Felix a kondenaren ti liderato ti Region 1 police iti kapigsaan a manera ti insidente ket imbilinna kadagiti taona iti panangsiguradoda iti maximum security iti nasao a lugar a pagminasan ken iti ili ti Quirino tapno malapdan ti pannakaulit ti kasta nga insidente.

Imbilin pay ti direktor ti panangiwayat ti Ilocos Sur police iti in-depth investigation mainaig iti nasao nga insidente a mapapati nga inwayat dagiti kameng ti New People’s Army (NPA).

Inako ti Antonio Licuanan Command ti NPA nga agdakdakiwas iti Benguet, Abra, Mountain Province ken Ilocos Sur (BAMPIS) nga isuda ti akinresponsibilidad iti panagpuor iti ekuipo.

Kanaig daytoy, nagturong da Senior Supt. Nestor Felix, acting provincial director, ken dagiti kameng ti Ilocos Sur PPO PIDMB ken maysa a team manipud iti ISPPSC iti nakapasamakan ti panagpuor iti ekuipo tapno mangiwayatda iti inbestigasion.

Kas maibatay iti inisial a panagimbestiga dagiti polis, idi agarup 11:50 ti rabii ti Pebrero 18, maysa a di nabigbig nga armado a lalaki ti simrek iti compound a yan ti ekuipo ket imbilinna kada Jose Rapadas, security guard, ken ni William Ong, caretaker dagiti ekuipo, ti panangiddepda kadagiti selponda idinto nga inyam-ammona ti bagina a miembro iti NPA.

Madamdama, nagparang dagiti dadduma pay a kakadua ti kameng ti NPA ket binuyatanda iti gasolina ti saan a maar-aramat nga ekuipo sada pinasgedan.

Nagpaut iti maysa nga oras ti pannakapuor ti ekuipo ti South Ocean Mining Corporation a kukua ti maysa a Peter Hay, maysa a chinese national.

Saan pay nga ammo ti balor ti napuoran nga ekuipo.

Daytoy ti maikadua a gundaway nga adda mapuoran nga ekuipo iti ili ti Quirino nga insayangkat dagiti kameng ti NPA.

Idi Abril 11, 2014, pinuoran dagiti mapapati a kameng ti NPA Alfredo Cesar Command ti drilling machine ti Freeport Mc-Moran Phelps Dodge Mining Company.

Segun iti ACC, pinuoranda ti drilling machine ti nasao a kumpania tapno “madusa daytoy gapu iti (uppat a tawen) a makadadael nga eksplorasion ken kas suportada iti komunidad gapu iti aglaplapusanan a panangsupringda iti ekstension ti proyekto ti eksplorasion ti kumpania”.

Addaan ti Phelps Dodge babaen ti partnership iti Northern Horizon iti permit ti eksplorasion a mangsakup iti 5,870 ektaria iti ili ti Quirino a pakairamanan ti Barangay Laylaya ti Besao.

Maipalagip nga idi 2006 ken 2009, sinupring dagiti agnaed ti eksplorasion iti lugarda ngem idi Mayo 2010, mapapati a nagun-od ti kumpania ti butos dagiti lumugar para iti dua a tawen a kontrata.

Dua a bulan kalpasanna, nangrugin ti eksplorasion ti kumpania iti Barangay Patiacan.#