BANNER NEWS: Maipuslit a botcha, kinumpiska dagiti polis

STO. DOMINGO, Ilocos Sur – Maysa a traysikel a nagkarga iti dead meat ti na-intercept dagiti polis ken ti market master ditoy nga ili sadiay Barangay Camestizoan ditoy idi malem ti Huebes.

Inaresto dagiti polis, kaduada ni Market Master Randy Reburon dagiti naglugan iti traysikel a nagkarga iti dead meat a nabigbig a maysa a Mark Anthony Alqueta y Fermato, 27, naasawaan, ken Jaynard Aslor, 24, naasawaan, agpada a residente iti Barangay Capangpangan, Vigan City.

Kinumpiskada met ti dead meat (botcha) a kinarga ti Honda TMX tricycle.

Segun iti inisial a panagimbestiga dagiti polis,  maysa a Louie Alquetra a taga-Capangpangan, Vigan City ti akinkukua iti botcha nga agdagsen amin iti sumurok kumurang 150 a kilos ket maideliber koma iti maysa nga agnagan iti Flora Peros iti Barangay Camestizoan.

Indeklara ni Provincial Veterinarian Dr. Warren Bragado dagiti nakumpiska a karne a botcha ket pinaikalina iti dumpsite ti ili a masarakan iti Barangay Sto. Tomas.

Daytoy ti maikadua a gundaway nga adda matiliw nga agipuslit iti botcha a mailako iti las-ud ti dua a bulan.

Idi kanikadua a bulan, nasukalan da Vigan City Slaughterhouse Master Dr. Arnulfo Quitoriano ti maysa a partidor a nagipuslit iti botcha a baboy iti tiendaan publiko sana impaangkat iti maysa nga aglaklako iti karne.

Iti panagrekoridana iti tiendaan ti Vigan, nasukalan ni Quitoriano nga adda nailaok a botcha kadagiti presko a karne ti baboy a lako ni Ellen Cariaga, tindera a taga-Bantay, Ilocos Sur iti puestona.

Idi sinitar da Quitoriano ni Cariaga, impalgakna nga inangkatna dagiti karne a lakona ken ni Jojo Lazo, partidor a taga-Bayubay, San Vicente, Ilocos Sur.

Mapattapatta nga aganay 20 kilos dagiti nailaok a botcha. Ngem posible nga ad-adu pay agsipud ta addan dagiti naideliber ni Lazo kadagiti sukina nga agor-order kenkuana iti karne ti baboy.

Kas dusa ti partidor, napatawan iti dakkel a multa ket naparitan a mangusar iti puestona iti tiendaan  agingga iti saanna a mabayadan ti multana. Karaman met a napagmulta ti tindera a nakasukalan kadagiti nailaok a botcha.

Kinuna ni Quitoriano a nalaka a mailasin ti karne a botcha agsipud ta  nagalis a pumigket no iggaman ken adda buyoknan no angoten. Kasta met a nangisit ken nalabbaga dagiti paragpag agsipud ta saan a napadara ti baboy sakbay a naparti.

Iti babaen ti RA 10536, naikalawa ti sakawen ti “hot meat” ket karamanen ti “botcha”, cold slaughter or “double dead”) (karne manipud iti nagsakit wenno natay nga animal) kasta met dagiti illegal a naangkat a karne ken dagiti produkto ti karne, nga agpada a saan a mapagmulta iti babaen ti RA No. 9296 ngem iti babaen ti RA No. 10536 maikonsideran a panaglabsing maikontra kadagiti tattao nga addaan saan laeng a multa no di pay pannakaibalud kas penalties.#