BANNER NEWS: Mamayor, suportaranda ingangato ti presio ti tabako

(Karaman ti report ni Mancielito S. Tacadena)

 

VIGAN CITY – Sangsangkamaysa dagiti mayor nga idauluan ni League of Municipalities of the Philippines, Ilocos Sur Chapter President Germelina Singson-Goulart a nangibatad iti suportada iti addang ni Gov. Luis “Chavit” Singson para iti pannakaingato ti presio ti tabako.

Maysa a resolusion ti dagus nga impasa ti grupo dagiti local chief executives tapno ipakitada ti iyaanamongda saan la nga iti House Bill 5727 no di ket iti pannakaingato ti presio ti tabako.

Maysa pay a manipesto ti inrugida a saan pay laeng nga ilako dagiti mannalon dagiti tabakoda agingga a saan nga umanamong dagiti aggatgatang a maingato ti presio daytoy.

Kinasango ni Singson dagiti mayor iti probinsia idi Marso 16 tapno dawatenna ti suporta dagitoy iti pannakirupakna para iti pannakaingato ti presio ti tabako.

“… Manipud idi nagtiponda (Fortune Tobacco Inc. ken Philip Morris), bimmaban ti presio (ti tabako),” kinuna ni Singson bayat ti pannakitaripnongna kadagiti local chief executives.

Innayon ti gobernador a no “kayattayo daytoy, kanayondanto nga ar-aramiden kadatayo.”

“No ituloytayo ti agriri, siguraduek a ngumato a ngumato ti presio ti tabako,” kinuna ni Singson.

Indawat ti gobernador kadagiti mamayor nga ipaawatda kadagiti mannalon nga “aggarawtayo para kadakuada” sana indagadag a masapul ti panagtitimpuyogda tapno magun-odda ti nangatngato a presio ti tabako.

Inyunay-unay ti gobernador a “no agsisinatayo, awan ti bambanagentayo” ket agsubli ti industria ti tabako a kas idi a maus-usar laeng dagiti mannalon ti tabako.

Dinawat ti gobernador nga agaramid dagiti mamayor iti resolusion nga awan ti agmulmula nga agideliber iti tabako ken agbayad iti utangna no saan a ngumato ti presio daytoy a produkto.

Adu dagiti mannalon ti naki-tie-up iti Philip Morris ket pinautangan ida ti kompania iti gastuenda iti panagtarakenda iti tabako ngem iti kompania ti paglakuanda iti apitda.

Kinuna pay ni Singson a tinawen nga adda tripartite a maang-angay, ngem “tinawen a loklokuendatayo ta nababa met ti presio ti tabako” idinto nga impalgakna a billiones a doliar ti mapaspastrek dagiti kompania ti sigarilio.

Kinuna ti gobernador a dinan pakibiangan ti gakat a pannakaingato ti sin tax iti sigarilio no maited dagiti kompania ken traders ti presio a kayat dagiti mannalon.

“Sakbay a pagriririanda ti buis, ti pay industria ti unaenda gapu ta awan ti buis no awan ti tabako,” kinuna pay ni Singson.

Agtaltalinaed ti pammati ni Singson a saan a mapasamak ti pagbutbutngan a pannakatay ti industria ti tabako gapu ta kasapulan latta dagiti cigarette manufacturers ti bulong ti birhinia a tabako a ditoy laeng Kailokuan a maimulmula.

Inlawlawagna a ngumato pay ketdi ti makolekta ti R. A. 7171 no ngumato ti buis a makolekta ti gobierno.

Nagpanawagan met ni Singson kadagiti dadduma pay a tobacco producing provinces tapno makikaysada iti ilunglungalong dagiti opisial iti Ilocos Sur.

“Ti makunak, no kuntenton dagiti sabali a probinsia iti presio ti tabakoda, saandakamin a biangan ditoy ngem no saanda a kuntento kasapulan ti pannakitinnulongda kadakamin,” kinuna ti gobernador.

Mainaig itoy, bimmisita ti sumagmamano a Singaporean investors iti probinsia idi Marso 17 tapno amirisenda ti binulong ti tabako ditoy. Karaman kadagiti pinasiarda dagiti katabakuan iti umuna a distrito kasta metten ti flue-curing barn iti Sinait a kayatda a masimpa para iti pannakausarna a paglutuan iti tabako.#