BANNER NEWS: Manipesto dagiti mannalon: dida aglako, agbayad no saan a maipangato presio ti tabako

CANDON CITY – Itantan  dagiti mannalon ti tabako ti panaglakoda iti produktoda ken agbayad iti utangda no saan a maipangato iti kapkapnekanda ti presio ti tabako.

Daytoy ti napagkaykaysaan dagiti mannalon ti tabako nga impalaon iti manipestoda bayat ti maysa a miting a naangay ditoy siudad idi Marso 23 kas panagtungpalda iti panawagan ni Gov. Luis “Chavit” Singson tapno tinongenda iti maymaysa a takderda mainaig iti nababa a presio daytoy a produkto gapu iti mapapati a kaaddan ti monopolia ti tabako gapu iti panagtipon ti Philip Morris ken ti Fortune Tobacco Corporation.

Imbatad pay dagiti mannalon babaen ti nasao a manipestoa kayatda a maingato ti presio ti tabako iti P30.00 manipud iti napagtitinongan a floor price ti tabako iti tripartite conference ken iti pannakaipakat ti nasimsimple a panaggrado iti naluto a bulong ti tabako.

Kabayatanna, nangiparuar dagiti local chief executives iti maysa a resolusion a mangsuporta kadagiti mannalon ti tabako ken iti  panangitantanda pay laeng ti panaglakoda iti tabakoda kadagiti traders ken manufacturers kabayatan ti pannakaisayangkat ti negosasion para iti pannakaipangato ti presio ti tabako.

Kinuna ni Singson a manipud idi nagtipon ti Fortune Tobacco Inc. ken Philip Morris), bimmaban ti presio ti tabako ket no saan nga agriri dagiti mannalon, saanto a ngumato iti pakapnekanda a presio daytoy a produkto.

Innayon ti gobernador a no ituloy dagiti mannalon ti agriri, siguraduenna a ngumato a ngumato ti presio ti tabako idinto nga indagadagna a masapul ti panagtitimpuyogda tapno magun-odda ti nangatngato a presio daytoy kangrunaan a produkto iti Ilocos Sur.

Kinuna pay ni Singson a nupay adda tripartite a maang-angay, “tinawen a loklokuendatayo ta nababa met ti presio ti tabako”, sana impalgak a biliones a doliar ti mapaspastrek dagiti kompania ti sigarilio.

Kinuna ni Singson a saan a mapasamak ti pagbutbutngan a pannakatay ti industria ti tabako gapu ta kasapulan latta dagiti cigarette manufacturers ti bulong ti birhinia a tabako a ditoy laeng Kailokuan a maimulmula.

Inlawlawagna a ngumato pay ketdi ti mabingay ti probinsia manipud iti R. A. 7171 no ngumato ti buis a makolekta ti gobierno.

Ni Singson ti nangputar iti RA 7171 a nangituding ti pannakaited iti 15% iti excise tax ti mapartuat a sigarilio kadagiti agmulmula iti Birhinia a tabako a pakaibilangan ti Ilocos Norte, Abra, La Union, ken Ilocos Sur.#