BANNER NEWS: Mannalon, napapatay bayat panaglutona iti pangrabiida

CANDON CITY –  Kitkitaen dagiti inbestigador ti anggulo a dua a tao ti nangisayangkat iti pannakapapatay ti maysa a mannalon  sadiay Barangay Salvador 2nd ditoy idi sardam ti Disiembre 11 agsipud ta nakarekobreda kadagiti kapsula a nagtaud iti dua a klase ti paltog iti nakapasamakan ti krimen.

Daytoy ti maysa nga anggulo a kitkitaen dagiti inbestigador kalpasan a nakasarakda iti maysa nga slug manipud iti cal. 45, 3 a kapsula manipud iti cal. 45 ken 3 kapsula manipud iti cal. 9mm  iti nakapasamakan ti krimen.

Ngem awan pay ti maibaga dagiti polis a motibo iti pannakapapatay ni Geoffrey Orpilla y Gacusan, 34, naasawaan, mannalon ken residente iti nadakamat a barangay idi agarup alas 7:00 ti sardam ti nasao a petsa bayat ti panaglutona iti pangrabiida iti likudan ti balayda.

Segun ken ni Cecile, 29, asawa, ti biktima, adda iti uneg ti balayda ken dagiti tallo nga annakda idi nakangeg kadagiti kanalbuong ken ti panagriaw ti lakayna iti “annayko!”

Kinuna ni Cecile nga idi rimmuar, nakitana ti asawana a nadaleb a nakapakleb iti daga idinto a maysa a lalaki a mapattapatta nga agtayag iti 5’3”, nakaaruat iti nangisit a sando ken bull cap ken maskulado ti mangipatpaturong iti paltogna iti biktima.

Dinagdagus ni Ceceile nga inserra ti ridaw sa naglemmeng idi pinaturongan ti di nabigbig a suspek iti paltog.

Madamdama, nakangeg manen ti babai kadagiti kanalbuong manipud iti yan ni lakayna.

Iti pannakaisurat daytoy, agtultuloy ti panagpalutpot dagiti polis mainaig iti nasao a pammapatay.

Kabayatanna, dua a lalaki ti pinidut dagiti polis a suspek iti pannakapaltog iti agina a nakagudasan ti anakna sadiay Barangay Catucdaan, Cabugao  idi rabii ti Disiembre 11.

Kinuna ni Police Chief Inspector William Nerona, hepe ti polis ditoy nga ili,  a naipakatanen iti paraffin test dagiti suspek nga innagananna a da Jerome Garma ken Mark Lawrence Sabugo, agpada a residente iti Barangay Catucdaan, tapno maammuan no positibo ti imada iti pulbora.

Innala dagiti polis dagiti dua iti police station para iti naun-uneg pay nga inbestigasion mainaig iti pannakapaltog da Imelda Pines y Pacis, 47, naasawaan, ken ti anakna a ni Marife Pines y Pacis, 10, Grade V pupil iti Catucdaan Elementary School, agpada a residente met laeng iti nadakamat nga aldaw.

Iti interbiona iti radio, kinuna ni Nerona nga adda dagiti nakakita a nagkuyog dagiti dua a naggapu iti asideg ti nakapasamakan ti krimen ken adda nakailasin kadakuada.

Kinuna pay ti hepe ti polis nga awan dagiti dua iti balayda idi napan dagiti polis iti dayta met laeng a rabii tapno mapagsaludsodanda kalpasan a nadakamat ti naganda iti pammaltog.

Ngem pinaglibakan dagiti suspek nga adda pannakainbolbarda iti pammaltog idinto a kinunada nga addada iti maysa a natayan iti oras a pannakaisayangkat ti pammaltog ket adu ti makapaneknek iti dayta kangrunaan dagiti pamiliada a kinakuyogda.

Impetteng pay da Garma ken Sabugo a saanda a nagkuyog idi napanda iti natayan.

Ngem kinuna ni Nerona a beripikaranda pay no agsasao dagiti dua iti pudno babaen ti panangiwayatda iti panagimbestiga iti natayan nga imbaga dagiti dua a yanda idi mapasamak ti pammaltog.

Iti inisial nga inbestigasion dagiti polis, nagpuesto ti suspek iti ruar ti balay da Pines sana pinaputokan iti namitlo dagiti agina a nakaidda iti dayta nga oras iti uneg ti balayda a nagsagrapan ni Imelda iti sugat iti makannigid a takiagna ken nadumaduma a paset ti bagi ni Marife.

Naitaray iti Suero General Hospital dagiti agina sa naiyalis ni Marife iti Gabriela Silang General Hospital a nakatayanna bayat ti pannakatamingna dagiti sugatna.

Awan ti asawa ti biktima iti balayda iti dayta a rabii.

Mapapati a Gauge 12 shotgun ti naaramat iti pammaltog kas maibatay iti nasarakan dagiti inbestigador a dua a live ammunitions, 3 a kapsula, 6 a pellets ken maysa a tubular magazine iti crime scene.

Kinuna ni Nerona a kitkitaenda ti anggulo a maysa a napukaw a selpon ti ramut ti pammapatay.

Segun iti report, ti asawa ni Garma ti napukawan iti selpon ket ni Imelda ti mapabpabasol a nangala.

Kinuna ni Nerona nga adda pay nasagapda a report a nainbolbar ni ni Imelda iti panagtakaw iti maysa a groseriaan sadiay San Juan, Ilocos Sur.

Ngem pinaglibakan ni Imelda nga isu ti nangala iti selpon idinto a linagidawna ti pannakairamraman ti inosente nga anakda.#