BANNER NEWS: Mannalon, pinaltogan ti barangay captain

NARVACAN, Ilocos Sur – Dati a susik ti ramut iti panangpaltog ti maysa a barangay captain iti maysa a mannalon sadiay Sitio Limmansangan, Barangay Margaay, ditoy nga ili idi rabii ti Nobiembre 18.

Nabigbig ti biktima a ni Felix Cabigas y Atinaja, 47, naasawaan, mannalon ken residente iti Barangay Abuor ditoy met laeng nga ili idinto a nainaganan ti nangpaltog kenkuana ni Barangay Captain Isabelo Arcena, Jr.

Segun iti report, adda ti biktima iti dalanna nga aggawid iti dayta a rabii ket idi makagteng iti rangtay iti Barangay Abuor, kellaat a nagparang ti suspek a nakalugan iti motorsiklo ket pinaltoganna ti biktima iti sumagmamano a daras a nakatiruan ti nadumaduma a paset ti bagi daytoy.

Nupay nasugatan, nabaelan ti biktima ti nagtaray agingga iti naarinuknok iti sanguanan ti balay ti maysa a Narcio Lucero iti nadakamat met laeng a lugar.

Intaray dagiti nagresponde a polis-Narvacan ti biktima iti Central Ilocos Sur District Hospital para iti pannakataming dagiti sugatna sa naiyalis iti Gabriela Silang General Hospital, Barangay Tamag, Vigan City.

Mapapati a cal. 45 ti naaramat a paltog kas maibasar iti maysa a kapsula a nasarakan iti crime scene.

Iti pannakaisurat daytoy, birbiroken pay dagiti polis ti suspek a naglibas kalpasan iti panangpaltogna iti biktima.

Mapapati a dati a susik ti puon ti nangpaltogan ni Arcena ken ni Cabigas.#