BANNER NEWS: Miembro ti Akyat Bahay Gang, nagudas iti pannakipinnaltogna kadagiti polis

VIGAN CITY – Maysa a dati a miembro ti Akyat Bahay Gang ti nagudas kalpasan a mapapati a nakipinnaltog kadagiti polis a mangaresto kenkuana idi agsapa ti Enero 5 iti Barangay Raois ditoy siudad.

Saanen a naidanon ti biag ni Renato Lubbui y Bugarin, 55, naasawaan, natibo ti Makanaya, Cagayan, iti Gabriela Silang General Hospital gapu iti sugat a sinagabana.

Iti pannakiuman ti DWRS ken ni Police Chief Inspector Villaflor Bannawagan, provincial officer ti CIDG-Ilocos Sur, kinunana a nangasut ni Lubbui iti paltog ken nagpaputok gapuna a simmungbat a nagpaputok dagiti polis a nangaresto kenkuana a puon ti nakatayanna.

“Nagpaputok iti naminsan ket agpaputok koma manen isu a nag-retaliate ti tropa…” kinuna ni Bannawagan iti nasao nga interbio.

Ngem iti interbiona iti nasao met laeng a radio station, impetteng ti asawa ti biktima nga awan ti paltog ti asawana idi simmurot kadagiti polis. (Basaen ti kaabayna a damag. -Ed)

Nagturong dagiti elemento ti CIDG ken ken ISPPSC iti panangidaulo ni Bannawagan ken babaen ti koordinasion ti polis Vigan  iti Barangay Raois idi agarup 5:30 ti bigat ti nadakamat a petsa tapno ipatungpalda ti warrant of arrest maikontra ken ni Lubbui mainaig iti kasona a robbery with homicide and frustrated homicide.

Kinuna ni Bannawagan a kameng ti biktima iti Akyat Bahay Gang  nga idauluan ti Alamo group dagiti agtatakaw iti Cagayan ket sumangsango daytoy kadagiti kaso iti korte ti nadakamat a probinsia.

Kinuna pay ni Bannawagan a naibalud ni Lubbui iti Bilibid Prisons ket naikkan iti parole ngem nainbolbar manen iti krimen a pakairamanan ti kasona a robbery with homicide and frustrated homicide.

Impalgak pay ni Bannawagan a naaresto idi 2009 ni Lubbui ket naipupok iti pagbaludan iti provincial police office ngem naglibas.

Mapapati a naglemmeng ti biktima iti Cagayan ngem nagsubli iti Raois idi sakbay ti Paskua agsipud ta masaksakit.

Impaima ni PO2 Sammuel Balian iti Vigan City police dagiti narekobre iti crime scene a pakaibilangan ti dua a kapsula ti Armalite rifle ken maysa a cal 38 nga Smith and Wesson Magnum 357 a naaramid iti USA nga addaan iti lima a bala ken maysa a kapsula iti chamberna.

Iti pannakaisurat daytoy, adda iti morge ti Gabriela Silang General Hospital ti bangkay ti biktima tapno maautopsia ken maipakatan iti paraffin test.#