BANNER NEWS: Miembro ti Bolt Cutter Gang naipiskot dagiti polis

VIGAN CITY – Naipilaan iti kaso ti dua a kameng ti grupo dagiti mannanakaw a naipiskot dagiti polis ditoy siudad kalpasan a nasukalanda iti akto a panangpanggepda a mangserrek iti maysa a pagtagilakuan.

Napilaan iti kaso a robbery iti Vigan City prosecutor’s office da Warren Isalado y Ibayan, 35, naasawaan, residente iti Poblacion Tocucan, Bontoc, Mountain Province ken ni Rolando Bautista, residente iti Santiago, Isabela.

Madama a sapsapulen dagiti polis ni Bautista a nakalibas.

Idi agarup alas 2:45 ti parbangon ti Nobiembre 21, bayat ti panagpatrolia da PO3 Peter Aninag ken PO1 Gregorio Barcena iti Salcedo Street, Barangay III ditoy siudad, nakitada dagiti suspek a masuspetsa ti tignayda ket sinitada dagitoy sada immasideg.

Kellaat a nagtaray dagiti dua a nagpaamianan isu a kinamat ida dagiti polis.

Naipiskot dagiti pannakabagi ti linteg ni Isalado iti asideg ti pasdek ti Gaizel’s Carinderia ngem nakalusot ni Bautista.

Iti panagimbestiga dagiti polis, madama a leklekkaben dagiti suspek ti plywood iti likudan ti nasao a computer shop idi masalamaan ida dagiti agpatpatrolia a polis.

Iti daytoy a bulan, nagsaruno dagiti dua a pasdek ditoy Vigan a natakawan.

Natakawan idi parbangon ti Nobiembre 7 ti Footstep Store a nangkasakasan dagiti mannanakaw ti naglakuan a P23,000.

Natakawan met ti RCA cellphones and accessories idi rabii ti Nobiembre 8  ket kinasakas dagiti di pay nabigbig a mannanakaw ti 6 a nadumaduma a matartarimaan a selpon nga agpateg iti P53,500.#