Footer

BANNER NEWS: Nababa ti klasena a frozen foods naipuslit a mailako iti Ilocos Sur

CABUGAO, Ilocos Sur – Kalpasan ti pannakaapput dagiti oversized a baboy a nailibas a maidiskarga  iti probinsia itay nabiit, nababa ti klaseda a frozen products met ita ti naipuslit  idi malem ti Pebrero 11 a mailako kadagiti agindeg ditoy nga ili.

Pagsayaatanna ta nasiput ti barangay intelligence network ditoy nga ili ket intimbreda a dagus iti polis iti kaadda sadiay Barangay Sagayaden ditoy nga ili ti maysa a closed van a nagkarga kadagiti nababa ti klaseda a frozen products a napagparang a mailako babaen ti promo sale.

Kinuna ni Mayor Edgardo S. Cobangbang, Jr. a dagus a naitimbre kadakuada ti kaadda dagiti mapagduaduaan nga aglaklako iti frozen products iti ilina agsipud ta adda agkurkurri a monitoring aystem iti ili.

Kinuna ni Cobangbang  nga obligasionda ti nainget a panagmonitorda kadagiti ganggannaet a sumrek nga aglakolako iti ilida tapno masalakniban ti interes ken security dagiti consumers ti Cabugao.

Apaman a naawatda ti impormasion manipud iti BIN, nagresponde a dagus dagiti polis ket iti panagpalutpotda, naammuan a maysa a Joselito Pasubillo y Serna, 55, naasawaan, ken residente iti 48-B Gen. Luis St., Novaliches, Quezon City, ti nagmaneho iti Isuzu closed van a nagkarga kadagiti frozen foods ken kaduana ni Roger Aguinaldo y Valen, 39, naasawaan, ken residente iti 10-A Robina Road, Nagkaisang Nayon, Quezon City ken mapapati a sales agent dagiti frozen products.

Kinuna ni Mayor Edgardo S. Cobangbang, Jr. a saan laeng a frozen products ti kinarga ti lugan no di pay naparti a nababa ti klasena a karne ti baboy a naikabil kadagiti styrofoam ket dagitoy ti naipasiapasiar a nailako.

Segun iti mayor, nagsuspetsada a madi a klase dagiti karne ti baboy agsipud ta malaksid nga awan ti plaka ken nagan ti lugan, naduktalanda pay nga awan ti naan-anay a dukomento a naipakita ti drayber ti lugan ken ti kaduana a mapapati a salesman.

Naammuan  a sumurok kumurang 90.5 kilos dagiti assorted frozen products a naikarga iti tallo nga styrofoam box ken mapapati a kukua ti Jess Nor Food Products.

Suspetsa dagiti polis nga addan dagiti ili nga immuna a naglakuan dagiti suspek sakbay a naglakoda iti Cabugao.

Imbaga dagiti suspek a promotional sale dagiti frozen products ngem awan ti permisoda manipud iti National Meat Inspection Service ken mapapati a saan nga Ilocos Sur no di ket Capital Region ti pakaibiahean koma dagiti frozen foods.

Naipan ti nasao a lugan iti police station ket sinukimatda ti karga daytoy iti imatang ni Dr. Warren Bragado, Ilocos Sur Provincial Veterinarian ken ni Municipal Meat Inspector Raquel Ancheta y Somera.

Bayat ti pannakaisurat daytoy, maisagsaganan ti maipila a kaso a panaglabsing iti Section 50 ken Section 10 ti Rule 10.3.1 ti RA 9296 wenno Meat Inspection Code of the Philippines maikontra kadagiti suspek.#