BANNER NEWS Nadumaduma a paltog, balbala, nakumpiska iti Santol, La Union

SAN FERNANDO CITY – Nakakumpiska dagiti nagtitipon a police elements kadagiti nadumaduma a paltog ken balbala manipud iti uppat a behikulo sadiay Barangay Paagan, Santol, La Union idi Mayo 16.

Kinuna ni Police Chief Superintendent Ricardo C. Marquez, Police Regional Office 1 (PRO1) director, nga uppat a search warrants ti inyisio ni Judge Narciso Mingua, ti  Branch 34, Municipal Trial Court (MTC) iti nadakamat nga ili, para amin iti panagsalungasing iti Presidential Decree 1866 kas inamendaran ti Republic Act 8294 wenno Illegal Possession of Firearms and Ammunition kas maiyannurot ti Comelec gun ban kalpasan a naireport a nagkarga dagiti nadakamat a behikulo kadagiti armas.

Kabayatanna, iti reportna ken ni Marquez, kinuna ni Police Senior Superintendent Ramon L. Rafael, La Union police director, nga idi agarup 1:00 ti bigat ti Mayo 13, nagresponde ti Quick Reaction Team (QRT) ti Regional Public Safety Battaliion 1 (RPSB1) a nakabase iti Barangay Nagleddegan, Balaoan kalpasan a nakaawatda iti complaint iti kaadda dagiti armado a tattao iti Barangay Pagaan.

Kinuna ni Rafael nga idi makaasideg ti QRT iti nadakamat a lugar, tallo a suspetsado a lallaki ti nangpanaw a nakalukat ti maysa a Hyundai Grace Van. Kalpasan ti panagsukimat dagiti polis iti nadakamat a lugan babaen ti flashlight, dagus a kinordonda ti lugar.

Kinuna ti regional director nga apaman a naalada dagiti search warrants, naggigiddan nga inyimplementar dagitoy dagiti nagtitipon nga elemento ti Regional Special Operations Task Group (RSOTG) La Union nga indauluan ni PSSupt. Reynaldo G. Biay a nakaibilangan ti La Union  Criminal Investigation and Detection Group (CIDG), PNP Legal Service, Regional Intelligence Division (RID), Provincial Investigation and Detection Management Branch (PIDMB), RPHU1, RIU, RPSB1 ken Santol Police Station a nagtungpal iti pannakakumpiska ti maysa a colt M16 armalite rifle, baby armalite rifle, 30mm carbine rifle ken nadumaduma a  magazine assemblies ken ammunition.

Kabayatan ti panagsukisok, nupay awan a presente dagiti akinkukua a da Eugenio Dacumos, Marcelino Arellano II ken Floresco Sayangda, inrepresentar ida ni Atty. Nancy L. Bilaoen babaen ti Special Power of Attorney a pinirmaan dagiti respondente ken sinaksian da Barangay Captain Elardio Olay.

“Nupay nalpasen ti election day ngem saan pay a nagpatingga ti election period. Istrikto nga iyimplimentarmi ti gun ban law agingga iti maudi a minuto ti Hunio 13,” kinuna ni Marquez.

Iti pannakaisurat daytoy, addan iti kustodia ti La Union CIDG dagiti nakumpiska nga armas kalpasan ti umisu a pannakaidukomentoda, idinto a naipan iti kustodia ti PIDMB ti La Union police dagiti lugan a pakaibilangan ti Honda CRV, Hyundai Stares Van, Toyota Hi-Lux ken Mitsubishi Pajero.#