BANNER NEWS: Nadumaduma a paltog, nasukainan dagiti polis iti balay dua a kandidato

MARCOS, Ilocos Norte – Positibo ti resulta ti insayangkat dagiti polis  a nagsina a panagsukisok iti pagtaengan ti dua a kandidato para mayor ditoy nga ili idi agsapa ti Abril 2.

Nagsina a sinukisok dagiti nagtitipon a bunggoy dagiti polis manipud iti CIDG, Provincial Police Office, Regional Public Safety Management Office ken sumagmamano a police stations ti balay da pailayon a Mayor Salvador Pillos ken ni Arsenio Agustin, kandidato a para mayor ditoy nga ili a nakalaanda kadagiti nadumaduma a klase ti paltog.

Nakaala dagiti polis iti balay ni Pillos iti dua a cal. 7.62, dua a cal. 5.56, maysa a cal. 30, tallo a cal. 45, ken tallo a shotgun.

Nakaala met dagiti nagsukisok iti balay ni Agustin iti maysa a 9 mm ken maysa a cal. 45.

Nupay kasta, kinuna ti polis a nalisensiaan dagiti paltog a naalada iti balay dagiti dua a politiko, malaksid iti dua a paltog ni Pillos a kasapulan ti panangberipikada no adda met laeng lisensiada.

Segun iti polis, awan met ti maipila a kaso maikontra kadagiti dua a kandidato.

Ngem linagidaw dagiti kameng ti media ti pannakaiserra ti ruangan ti balay ni Pillos kabayatan ti pannakaisayangkat ti panagsukisok.

Itay nabiit, naikkat ti Ilocos Sur nga “area of concern” ngem naisandi ti Ilocos Norte iti listaan ti Commission on Elections ken ti PNP a kas “area of concern” maigapu kadagiti nagsaganad nga insidente ti pammaltog idi bulan ti Pebrero.

Idi Pebrero 4, pinaltogan dagiti armado a lallaki a nagkalubbon iti motorsiklo ni Pillos iti sango ti Marcos Agro-Industrial School.

Nalasatan ni Pillos ni patay ta nagsagrap laeng iti sugat iti saka ken imana.

Mapapati a kameng ti gun for hire gang ti suspek a nanggandat iti biagna, maysa a managan Jofel Rezon, taga-Turod Patac, Cabugao, Ilocos Sur.

Idi Pebrero 23, pinapatay dagiti armado a tattao a riding in tandem ni Alfred Arce, independiente a kandidato a para mayor iti Marcos.

Malaksid ti Ilocos Norte, karaman dagiti dadduma pay nga “areas of concern” ti Abra, Pangasinan, La Union, Pampanga, Cagayan, Nueva Ecija, Cavite, Batangas, Masbate, Western Samar, Misamis Occidental, Maguindanao, Lanao Del Sur, Basilan, ken Lanao Del Norte.#