BANNER NEWS: Naglibas a balud, natiliw sadiay Marikina

TAGUDIN, Ilocos Sur – Kalpasan ti nasurok a tallo a bulan a panaglemmengna, natiliw met laeng dagiti polis ti maysa a naglibas a balud iti maysa a village sadiay Marikina City itay nabiit.

Inaresto dagiti nagtipon nga elemento ti Tagudin ken ti Marikina City police stations ni Joel Mostoles y Soriano, 30, naasawaan, residente iti Barangay Ilokano, Sudipen, La Union ken sumangsango iti panaglabsing iti RA 9165 iti Regional Trial Court Branch 25 iti Tagudin sadiay River Side, Provident Village, Brgy. Dela Peña, Marikina City idi agarup 9:30 ti bigat ti Nobiembre 29.

Segun ken ni Ilocos Sur  Provincial Director Senior Supt. Jemar Delgado Modequillo, apaman a nakaawat ti Tagudin police station iti impormasion nga aglemlemmeng ni Mostoles iti nadakamat a village, babaen ti intelligence networking, kinontakna ni Police Supt. Raymund Liguden ti Task Force China Town, HQ Manila Police District, NCRPO ket babaen ti tulong ti nasao nga opisial, kaduana da PO1 Mae Roselle Lacasandile, polis-Tagudin a nakikoordinar iti Marikina police station para iti pannakakemmeg ti naglibas a balud.

Babaen ti direkta a superbision ni Senior Supt. Reynaldo B. Jagmis, hepe ti polis ti Marikina CPS, nangisayangkat dagiti operatiba iti operasion maikontra iti suspek a nagtunged iti pannakatiliwna iti naglemmenganna a village.

Kalpasan a naipan ni Mostoles iti police station ti Marikina para iti dokumentasion ken disposision, idi agsapa ti Nobiembre 30, naipaima iti kustodia ti Tagudin police station a temporario a nakaibaludanna.

Maipalagip nga idi agarup alas 9:35 ti rabii ti Agosto 15, kabayatan ti panagrekorida dagiti dadduma a polis kadagiti pasdek-negosio, pagadalan ken dadduma pay a napateg a pasilidad, kiniddaw ni Mostoles iti guardiana a ni PO1 Mae Roselle Lubrin Lacasandile ti ipapanna iti kasilia agsipud ta makaib-ibbleng.

Nupay kasta, kinuna ti polis nga urayenda ti panagsubli ti alert team.

Kalpasan ti sumagmamano a minutos, kinarintar manen ti balud ti polis agsipud ta dina kanon maigawid ti iruruar ti takkina.

“Ma’am, rummuaren,” mapapati a kinuna pay ti balud.

Kinuna ni Lacasandile nga aguray ni Soriano ta apanna ayaban dagiti kaduana iti ngato.

Ngem idi limmabas ni Lacasandile iti selda, mapapati a kellaat a ginammatan ti balud ti makannigid a takiag ti polis sana binekkel agingga iti napukaw daytoy ti puotna.

Mapapati a nalettat ti balud ti padlock babaen ti panangkurikorna daytoy iti natirad a banag sa nagtaray a rimmuar iti akinlikud a ruangan.

Kinamat da PO3 Renel Ibea ken PO1 Roel Manangan ti balud ngem saandan a nasapulan.

Naikustodia ni Mostoles iti babaen ti Bureau of Jail Management and Penology, Tagudin, babaen ti commitment order a pinirmaan ni Judge Policarpio P. Martinez a napetsaan Disiembre 2, 2013.#