BANNER NEWS: Naglibas a lider ti gun-for hire group, simmuko

VIGAN CITY – Makabulan sipud pananglibasna kadagiti provincial guard nga eskortna, simmuko ti lider ti gun-for-hire group babaen ti panagtinnulong ti kapolisan ken maysa a konsehal idi malem ti Hulio 31.

Simmuko sadiay San Fernando City idi agarup 2:00 ti malem ti Hulio 31 ni Rodrigo Abiang, 40, akusado iti frustrated murder iti Narvacan Regional Trial Court babaen ti koordinasion dagiti operatiba ti Provincial Intelligence Branch (PIB) ti Provincial Police Office nga indauluan ni Supt. Edwin Col-long Balles, Chief Inspector Sosimo Raquepo Racho, action officer, PAIDSOTG ken babaen ti direkta a superbision ni Senior Supt. Nestor Eswagen Felix, OIC, ken negosasion a nakipartisiparan ni Konsehal Teresito Valera ti Narvacan, Ilocos Sur.

Iti report a naawat ti Tawid News Magasin, kalpasan ti mapapati a pannakasabat ni Abiang iti San Fernando City babaen ti lugan nga impatulod ni Valera, naipan iti maysa a safehouse a binantayan dagiti operatiba para iti seguridadna sa naipresentar ken ni Gov. Ryan Singson para iti pormal nga isusuko ken pannakaisublina iti provincial jail.

Kalpasan ti presentasion iti provincial capitol, nainget ti pannakaguardia ni Abiang ken nakaposas nga impanda iti kabarbaro a provincial jail sadiay Barangay Taleb, Bantay, Ilocos Sur.

Kinuna ni Singson a maragsakan iti pannakaisubli ni Abiang iti pagbaludan agsipud ta “dakkel a puntos daytoy” iti linak ken talna iti probinsia idinto a dinayawna ti kapolisan ken ni Valera gapu iti natalinaay nga isusuko ni Abiang.

 

Sumagmamano nga aldaw kalpasan ti panaglibas ni Abiang, nangitanggaya ni Singson iti P250,000.00 a gunggona iti asinoman a makaited iti impormasion para iti madagdagus a pannakatiliwna.

Segun ken ni Valera, immuna a nagtext kenkuana ni Abiang idi Mierkoles idi kanikatlo a lawas ti Hulio ket nagpatangda, sa manen timmawag kenkuana babaen iti selpon iti dayta met laeng a Biernes ket imparipiripna ti isusukona.

Kinuna ni Valera nga apaman a naan-anay a nakumbinsina ni Abiang a sumuko, nakikoordinar ken ni Provincial Director Senior Supt. Nestor Felix, Provincial Intelligence Branch (PIB) ti Provincial Police Office nga indauluan ni Supt. Edwin Col-long Balles, ken PAIDSOTG nga idauluan ni Chief Inspector Sosimo Raquepo Racho, action officer, para iti naannayas nga isusuko ni Abiang.

Kinuna ni Valera a nagpaing iti Solano, Nueva Ecija ni Abiang, para pakan iti manokna iti talonna, kalpasan ti pananglibasna kadagiti guardiana ket idi laeng nagtext daytoy kenkuana babaen ti selpon ti kaadda iti kontakda.

Iti interbio ken ni Felix, kinunana a maysa a tipster ti nangibaga iti whereabouts ni Abiang ket naiwayat ti naannayas nga isusuko ti balud babaen ti panag-follow-up ti intellience ken investigation branch ti PPO idinto nga innayonna a saan a rimmuar ni Abiang iti Ilocos Sur kalpasan ti pananglibasna kadagiti guardiana.

Kinuna pay ti provincial director nga awan ti tao a nangilemmeng ken ni Abiang idi naglibas.

Idi malem ti Mayo 22, inaresto dagiti nagtitipon nga elemento ti CIDG, Narvacan ken Santa police ni Abiang sadiay Barangay Labut Norte, Santa babaen ti warrant of arrest nga inyisio ni Judge Sixto D. Diompoc ti RTC Branch 72, Narvacan, gapu iti kasona a frustrated murder a nai-docket babaen ti Criminal Case No. 3791-N.

Mapapati a nakakumpiska pay dagiti polis iti granada, 6 balbala ken masuspetsa a hashish (marijuana extract) iti ikut ni Abiang idi inarestoda.

Idi Hunio 30, manipud iti provincial jail, ineskortan da provincial guard Efren Marzan, 36, ken ni Juanito Mercurio, 56, ni Abiang tapno dumatag iti korte para iti pannakabista ti kasona nga illegal a panagikut iti paltog iti korte ti Narvacan.

Mapapati a napan nagsi-nanglaw dagiti guardia iti maysa a panganan iti asideg ti korte.

Idi nakauneg dagiti guardia iti pagsinanglawan, kellaat a nag-taray ni Abiang iti laud a direksion nga agpa-Abuor.

Kanaig daytoy, napilaan da Mercurio ken Marzan iti criminal ken administrative complaints for infidelity in the custody of prisoner through negligence punishable under Article 224 of the Revised Penal Code and Gross Neglect of Duty iti Opisina ti Ombudsman idi Hulio 9.

Kinuna ni Singson nga agtuloy ti kaso dagiti dua a guardia agraman ti warden tapno maammuan no asino ti nagkurang iti trabahoda ken tapno saanen a maulit dagiti panagliway (lapses) no adda eskortanda a balud.#