BANNER NEWS: Naing-inget a kampania kontra illegal a sugal, maiwayat: PNP regional director

SAN FERNANDO CITY -Kinuna ti PNP regional director a doblienda pay nga igaed ti kampaniada maikontra iti hueteng ken dadduma pay a maiparparit a sugal iti hurisdiksionda agingga a mapugipog ti illegal a sugal iti rehion.

“Agtultuloy nga agisayangkatkami kadagiti operasion tapno mapugipog ti illegal a sugal iti rehion,” kinuna ti regional director.

Itay Septiembre 5, duapulo ket innem a tattao ti inaresto dagiti polis iti nagsina nga insayangkatda nga operasion kontra sugal iti probinsia ti Ilocos Sur ken Pangasinan.

Segun ken ni Police Chief Supt. Ricardo C. Marquez, regional director, PRO1, nga agdagup iti 24 ti naaresto sadiay Barangay Paras, Candon City, babaen ti maysa a raid nga insayangkat dagiti nagtitipon nga elemento ti Police Intelligence Branch ti Ilocos Sur Police Provincial Office (ISPPO) ken Candon City Police Station babaen ti koordinasion ti Criminal Investigation and Detection Group (CIDG) ti Ilocos Sur idinto a dua ti natiliw iti sabali a raid nga insayangkat dagiti operatiba ti Lingayen Police Station, CIDG Pangasinan, Regional Intelligence Division (RID), PRO1 ken Regional Intelligence Unit 1 (RIU1) sadiay Padilla Street, Poblacion, Lingayen.

Nainaganan dagiti natiliw a da Leo Tan, Alvin Pascua, Rose Lazo, Roy Munoz, Miguel Roxas, Jhun Monda, Rene Ragun, Joel Naruasa, Pedro Ramos, Edmar Gadia, Dan Valdez, Bony Ruiz, Cardo Ganab, Resty Raguindin, Abner Sabala, Josephine Liagas, Marilyn De Guzman, Liza Lorenzo, Cynthia Abalos, Loida Gamueda, Grace Del Rosario, Nida Domingo, Adora Abaya ken Diomedes Encarnacion, agnaedda amin iti Candon City.

Nakasamsam dagiti polis kadagiti assorted a papelitos a namarkaan iti Jai-Alai a mapapati a kukua ti Meridien Vista Gaming Corporation a nakaisuratan dagiti dua a numero a kombinasion ken ti pusta; bet money nga agdagup iti P60,800.00; 5 nga electronic calculators nga addaan iti adapter; 5 a calculator nga awanan iti adapter; maysa a nangisit a  handheld radio marked “ICOM IC-V8”  with charger marked ICOM BC-146; maysa a computer; maysa a computer monitor; nangisit a computer keyboard; computer mouse, 23 nga assorted a ball pen; 3 staplers; 2 boxes staple wires; maysa a rubber stamp, ken maysa a carton ti assorted papelitos.

Nabigbig met dagiti natiliw iti Lingayen a da Ricardo R. Ferrer alias Katdong, 51, naasawaan, ken mapapati a  financier; ken  Edzel F. Tantay, 30,  ken cabo, agpada a residente iti nadakamat a lugar.

Imet dagiti polis ti SW No. SCC-2013-76 maikontra ken ni Ferrer idi napanda nagsukisok a nakakumpiskaanda  iti pusta nga agdagup iti P29,270.00 ken nadumaduma a jueteng paraphernalia.

Sabali pay a raid ti insayangkat dagiti polis babaen ti bileg ti SW No. SCC-2013-77 maikontra ken Loreto D. Romero, alias Enget/Bading, ngem mapapati a naangotan daytoy ket pimmanaw.

Nupay kasta, nakakumpiska dagiti polis kadagiti nadumaduma a papelitos a nagmarka iti MVGC ken P350.00. a mapapati a pusta.

Napilaan dagiti naaresto a tattao iti panaglabsing iti Republic Act 9287, wenno an Act Increasing the Penalties for Illegal Numbers Game, Amending Certain Provisions of Presidential Decree 1602.#