BANNER NEWS: P3 kada kilo intuon manufacturers, traders iti presio ti tabako

VIGAN CITY – Dismayado ti gobernador ti Ilocos Sur ken dagiti mannalon ti tabako iti kabassit ti intuon dagiti agparpartuat iti sigarilio ken traders a presio ti produktoda a tabako.

Kalpasan ti panagpapatang dagiti kompania ti sigarilio ken aggatgatang iti tabako, napagnunummuanda a tuonanda iti P3 kada kilo ti presio daytoy a produkto, adayo a nababbaba nga amang ngem ti demanda dagiti mannalon ti tabako a mainayon a presio ti produktoda.

Sakbayna, iti maysa a miting a dinar-ayan dagiti mannalon ti tabako ken dagiti mamayor ditoy probinsia, nangaramidda iti manipesto a nangiyebkasanda iti pannakaingato ti presio ti tabako iti P30 kada kilo.

Iti dayta met la a miting, imbatad pay dagiti mannalon ti tabako ti pannakapasimple ti panaggrado ti tabako, saan a kas iti agdama a nadumaduma dagiti grado daytoy a produkto.

Nailanad iti manipesto ti panangsuportada iti dawat ti gobierno probinsial nga awan ti agilako iti tabako agingga a saan a patgan dagiti aggatgatang a maipangato ti presio iti saan a nababbaba iti P30 kada kilo.

Iti agdama a tobacco season, P72-P73 ti agtartaray a presio ti neutral flavor idinto a P92 iti full flavor.

Naipalaon pay iti manipesto ti saan a pannakatadtad ti grado ti mailako a tabako ken mapalukayan ti pannakagra-doda. Iti neutral agbalin a maysa a grupo ti A,B,C; sabali a grupo ti D,E,F1,F2 ken ti reject. Iti met full flavor, agtitipon a maysa a grupo ti A,B,C,D,E idinto a sabali a grupo ti reject.

Iti interbiona iti media, kinuna ni Gov. Luis “Chavit” Singson a manipud idi nagtipon ti Fortune Tobacco Corporation ken ti Philip Morris, bimmaba ti presio ti tabako agsipud ta nagbalinen a monopoliada ti pannakagatang daytoy a produkto.

Maipalagip a sakbay ti panagtipon dagiti dua, iti panagtatabako idi 2009-2010, simmuyop ti presio ti tabako iti P95 kada kilo ngem kalpasan ti merger dagitoy higante nga agparpartuat iti sigarilio, bimmaban ti presio ti tabako iti P72 idi 2010-2011.

Kinuna pay ni Singson a nupay adda naisaysayangkat a tripartite agreement, nalokloko laeng dagiti mannalon ti tabako agsipud ta bimmaba met ti presio ti tabako.

Indagadag ti gobernador nga agmaymaysa dagiti mannalon ti tabako a mangipetteng iti saanda a panaglako ken panagbayad iti utangda no saan a maingato ti presio daytoy a produkto iti kapkapnekanda a presio.

Ngem adda dagiti report nga adda dagiti mannalon a nagilibas nga agilako kadagiti produktoda agsipud ta kasapulanda ti kuarta iti baet ti pammasingked ti gobernador a tulonganna ida bayat ti pannagna ti negosasion a pannakaingato ti presio ti tabako.

Adda pay dagiti report a sumagmamano a koboys ti nagpaspasiar nga aggatang iti tabako kadagiti barbarangay ket napapatida dagiti mannalon a mangilako iti produktoda nupay awan pay ti naiyetnag a nangatngato a presio ti tabako.

Nupay dismayado iti nagbanagan ti panagpapatang dagiti cigarette manufacturers ken traders, kinuna ni Singson a kapatangnanto pay dagiti mannalon no kontentodan iti intanggaya dagiti manufacturers ken traders a baro a presio ti tabako wenno ituloyda nga ipetteng iti nangatngato a presio daytoy a produktoda.

Kinunana nga awan ti ma-baelanna no agmaymaysa ket masapul nga agtitimpuyog amin dagiti mannalon tapno napigpigsada a mangilaban iti nangatngato a presio ti tabako.#